Byłaja namieśnica redaktara «Sovietskoj Biełoruśsii», jakaja jašče niadaŭna była nieŭjaznoj u JEZ, naviedaje Vilniu.
Hanna Šadryna voźmie ŭdzieł u litaraturnym sieminary, arhanizavanym Centram hiendernych daśledavańniaŭ Jeŭrapiejskaha humanitarnaha ŭniviersiteta. Taksama jana pradstavić svaju knihu «Nie zamužam: seks, luboŭ i siamja za miežami šlubu».
Pra heta byłaja namieśnica Paŭła Jakuboviča napisała ŭ svaim akaŭncie ŭ sacyjalnaj sietcy «Fejsbuk».
«Na sieminary my chacieli b abmierkavać mahčymaść/nieabchodnaść adstojvańnia aŭtarskaj pazicyi, zachavańnia aryhinalnaha paviedamleńnia i stratehii addaleńnia ad hvałtoŭnaha raźmiaščeńnia nas i našych knih na karcie padvojnych supraćlehłaściaŭ», - napisała jana.
Mierapryjemstva adbudziecca zaŭtra, 16 studzienia.
Šadryna była aŭtaram materyjałaŭ u «Sovietskoj Biełoruśsii», u jakich napiaredadni vybaraŭ 2010 hoda źmiaščaŭsia paklop na adras aktyvistaŭ apazicyi i niekatorych kandydataŭ u prezidenty. Z-za hetaha jana razam ź inšymi čynoŭnikami i prapahandystami była ŭniesiena ŭ «čorny śpis» JEZ.
Paśla hetaha Šadryna sprabavała nie biez dapamohi aliharcha Piefcijeva damahčysia źniaćcia sankcyj. U traŭni minułaha hoda joj heta ŭdałosia. Šadrynu vyklučyli z «čornaha śpisu» i dazvolili ŭjezd u JEZ.
