Śledčym kamitetam Biełarusi zavieršana rasśledavańnie kryminalnaj spravy ŭ dačynieńni da byłoha namieśnika staršyni Homielskaha rajonnaha vykanaŭčaha kamiteta, byłoha dyrektara AAT «Homielski rajahraservis» i namieśnika dyrektara STAA «Biełsielhaspram».
Ustanoŭlena, što słužbovyja asoby, dziejničajučy ŭzhodniena, pieravyšajučy svaje słužbovyja paŭnamoctvy, rasparadžalisia majomaściu dziaržaŭnaha pradpryjemstva AAT «Homielski rajahraservis», adčužajučy jaho roznym subjektam haspadarańnia.
Śledstvam atrymanyja dokazy ŭsich akaličnaściaŭ ździajśnieńnia hetaha złačynstva. Schiema jaho zaklučałasia ŭ tym, što majomaść «Homielskaha rajahraservisa» niezakonna adčužałasia, pieradavałasia inšym jurydyčnym asobam pad vyhladam niehrašovaha ŭkładu ŭ statutny fond kamiercyjnaj arhanizacyi STAA «Biełsielhaspram». Hetaja jurydyčnaja asoba pryvatnaj formy ŭłasnaści była stvorana śpiecyjalna dla atrymańnia dachodu ad machinacyj, jakija pravodzilisia słužbovymi asobami.
Dziaržmajomaść adčužałasia šlacham falsifikacyj rašeńniaŭ ahulnaha schodu akcyjanieraŭ i naziralnaha savieta i pieradavałasia novym ułaśnikam biez praviadzieńnia aŭkcyjonu. Tak, z fondaŭ dziaržaŭnaha pradpryjemstva vydavalisia biespracentnyja pazyki roznym subjektam haspadarańnia, nabyvalisia aŭtamabili i inšaja majomaść.
Naprykład, za košt AAT «Homielski rajahraservis» dla patreb Homielskaha rajvykankama nabytyja piać aŭtamabilaŭ na sumu bolš jak paŭmiljarda rubloŭ, pieradadzienyja vykankamu biazvypłatna.
Vynikam supraćpraŭnaj dziejnaści saŭdzielnikaŭ hetaj złačynnaj schiemy źjaviłasia poŭnaja likvidacyja dziaržaŭnaha pradpryjemstva.
Dziejańni słužbovych asob kvalifikavanyja nastupnym čynam: byłoha namieśnika staršyni Homielskaha rajvykankama — pa č. 3 art. 424, č. 4 art. 16 č. 3 art. 426 KK; byłoha dyrektara AAT «Homielrajahraservis» — č. 3 art. 426, č. 1 art. 427, č. 2 art. 424 KK; namieśnika dyrektara STAA «Biełsielhaspram» — č. 2 art. 216, č. 3 art. 424, č.č. 1,2 art. 210 KK.
Bieručy pad uvahu naniesieny realnamu siektaru ekanomiki ŭron, śledčymi nakładzieny aryšt na asabistuju majomaść abvinavačanych i majomaść STAA «Biełsielhaspram» na sumu bolš jak 3,5 miljarda rubloŭ.
Aprača taho, padčas śledstva namieśnik dyrektara STAA raskajaŭsia ŭ zroblenym i kampiensavaŭ naniesieny jaho dziejańniami ŭron u poŭnym abjomie. U suviazi z hetym miera strymańnia jamu źmieniena z uziaćcia pad vartu na padpisku ab niavyjeździe i naležnych pavodzinach.
Dvoje inšych abvinavačanych zastajucca pad vartaj. Adzin ź ich taksama kampiensavaŭ naniesieny materyjalny ŭron.
U adras Homielskaha abłasnoha i rajonnaha vykanaŭčych kamitetaŭ adpraŭlenyja pradstaŭleńni ab likvidacyi pryčyn i ŭmoŭ učynieńnia złačynstva, vyjaŭlenych śledstvam u pracesie pracy.
Materyjały kryminalnaj spravy pieradadzienyja prakuroru dla nakiravańnia ŭ sud.
