Vykanańnie dziaržprahramy pa raźvićci haradoŭ-spadarožnikaŭ znachodzicca na niedapuščalna nizkim uzroŭni, zajaviŭ Alaksandr Łukašenka 17 studzienia na naradzie pa pytańniach budaŭnictva na terytoryi Minskaj vobłaści žyłych rajonaŭ dla žycharoŭ stalicy.
«Jašče ŭ 2008 hodzie pierad uradam była pastaŭlena zadača pierśpiektyŭnaha stvareńnia i raźvićcia haradoŭ — spadarožnikaŭ Minska, a ŭ 2010-m była zaćvierdžana adpaviednaja dziaržaŭnaja prahrama. Adnak jaje vykanańnie ciapier znachodzicca na niedapuščalna nizkim uzroŭni. Bolšaść mierapryjemstvaŭ abo jašče tolki prapracoŭvajucca, abo naohuł nie realizavany».
U Smalavičach, naprykład, dahetul nie ŭviedzieny pieršy šmatkvaterny žyły dom dla minčan, budaŭnictva jakoha pačata ŭ 2012 hodzie. «Navat pry ažyćciaŭleńni hetaha piłotnaha prajekta ŭźviadzieńnie nieabchodnych ab`iektaŭ inžyniernaj infrastruktury da hetaha času nie zabiaśpiečana», — skazaŭ Łukašenka.
Pavodle jaho słoŭ, naśpieła nieabchodnaść raspracoŭki adzinaha horadabudaŭničaha płana raźvićcia Minskaj ahłamieracyi, jaki adlustroŭvaje ŭsie isnyja patrebnaści. Akramia taho, nieabchodna vyrazna vyznačycca ź miescami raźmiaščeńnia novych rajonaŭ zabudovy ŭ haradach-spadarožnikach, dadaŭ kiraŭnik dziaržavy.
Łukašenka paznačyŭ niekalki pytańniaŭ, jakija patrabujuć ablivaj uvahi. U ich liku — aptymalnaść vybaru ziamielnych učastkaŭ.
«Bolš jak 50% zabudovy praduhledžvajecca raźmiaścić na sielskahaspadarčych ziemlach. Adrazu vam kažu, što heta niedapuščalna. Heta idzie ŭrazrez z patrabavańniami racyjanalnaha vykarystańnia ŭhodździaŭ, ź intaresami ahrapramysłovaha kompleksu — hałoŭnaha ekspartnaha patencyjału našaj krainy», — skazaŭ kiraŭnik dziaržavy.
«Razboju ź ziemlami sielhaspryznačeńnia być nie pavinna, — padkreśliŭ jon. — I ŭrad, i hubiernatary, asabliva Minščyny, za heta adkazvajuć hałavoj.
U nas bolš čym dastatkova ziemlaŭ, na jakich nikoli nie buduć apracoŭvacca sielskahaspadarčyja kultury. Moža być, troški daražej abydziecca heta budaŭnictva, ale na pierśpiektyvu heta ŭ sto raz tańniej. Siońnia ahrakompleks staŭ asnovaj ekspartu. My praz dva hady pavinny 7 młrd. dołaraŭ atrymać ad ekspartu sielhaspradukcyi. Dzie budziem vyrablać, kali my pad budaŭnictva addadzim dobryja ziemli?».
«U nas dastatkova bałot, niaŭdobic, chmyźniakoŭ, kab pryvieści ich u paradak i pastavić tam šmatpaviarchovyja i inšyja damy ci prampradpryjemstvy.
Lepš navat padrezać les i tam pabudavać pasiołak, čym leźci na ziemli sielhaspryznačeńnia. Vybirajcie łapiki pa 3-4 hiektary i tam zabudoŭvajcie», — zajaviŭ biełaruski kiraŭnik.
Łukašenka taksama źviarnuŭ uvahu na toje, što značnyja finansavyja resursy spatrebiacca na budaŭnictva ab`iektaŭ inžyniernaj i transpartnaj infrastruktury. «Jak buduć vyrašany pytańni ich finansavańnia, ź jakich krynic? I naohuł treba pahladzieć na hetyja inžyniernyja i transpartnyja sistemy, kab heta nie było pa tych savieckich lakałach, jak u nas kaliści było: nakreślili ałoŭkam u adnym napramku darohu i pačynajem siekčy, rezać i kałupać ziamlu, nie ličačy hrošy. Treba prymianiać samyja pieradavyja technałohii», — zajaviŭ kiraŭnik dziaržavy.
Jon pacikaviŭsia tym, jak uviazany z ahulnym raźvićciom rehijonu prajekty pa stvareńni takich bujnych ab`iektaŭ, jak Kitajska-biełaruski industryjalny park, praca pradpryjemstvaŭ SEZ «Minsk» u Fanipali i Dziaržynsku, dobraŭparadkavańnie terytoryi vakoł Nacyjanalnaha aeraporta, a taksama šmatfunkcyjanalnyja spartyŭnyja i rekreacyjnyja zony — Zasłaŭskaje vadaschovišča, Raŭbičy i Siličy.
«Čamu zamiest kompleksnaha padychodu da raźvićcia terytoryj praciahvajecca raspracoŭka adasoblenych płanaŭ pa składzienych u papiaredni pieryjad administracyjna-terytaryjalnych adzinkach?» — pastaviŭ pytańnie Łukašenka.
