photo.bymedia.net
U Biełarusi nieabchodna pravieści hłybokuju sistemnuju aptymizacyju achovy zdaroŭja. Ab hetym siońnia na pasiadžeńni kalehii Ministerstva achovy zdaroŭja Biełarusi pa vynikach pracy za 2013 hod zajaviŭ vice-premjer Anatol Tozik.
«Nieabchodna pravieści hłybokuju sistemnuju aptymizacyju, istotna pierahledzieć padstavy dla vykliku daktaroŭ, naviedvańnia paliklinik, vykliku chutkaj mieddapamohi.
Usie rašeńni pa hetym pytańni treba padrychtavać i pryniać na praciahu paŭhoda», — skazaŭ Anatol Tozik.
Jon adznačyŭ, što, pavodle źviestak Suśvietnaj arhanizacyi achovy zdaroŭja, u śviecie 20-40% vydatkaŭ miedycyny nieabasnavany. U Biełarusi prykładna takaja ž situacyja.
Anatol Tozik padniaŭ pytańnie ab sufinansavańni ludźmi akazvanaj im biaspłatnaj mieddapamohi.
«Ludzi nie razumiejuć realnaha koštu miedycynskich pasłuh. U nas pry kolkaści nasielnictva kala 10 młn čałaviek materyjalnyja kaštoŭnaści vyrablajuć 2,5 młn čałaviek, jakija pavinny ŭtrymlivać 7,5 młn astatniaha nasielnictva.
Heta sparadžaje ŭtrymanskija nastroi i pierakananaść u tym, što za svaim zdaroŭjem čałaviek pavinien sačyć nie sam, a dziaržava, miedyki», — skazaŭ vice-premjer.
Tozik skazaŭ, što jość pahroza dehradacyi miedycynskaj haliny, nieabchodna padymać zarobak miedykam, dadaje Interfaks.
