Sustaršynia hrupy «Zialonych» i « Jeŭrapiejskaha volnaha aljansu» ŭ Jeŭraparłamiencie Rebieka Charms zajaŭlaje, nibyta Siarhiej Arbuzaŭ, Andrej Klujeŭ i Mikałaj Azaraŭ majuć pašparty hramadzian Aŭstryi. Pra heta jana skazała padčas vystupu ŭ Strasburhu.
«Arbuzaŭ, Klujeŭ i Azaraŭ — ludzi, na jakich lažyć adkaznaść za hvałt i teror va Ukrainie, — majuć pašparty Aŭstryi i mohuć volna naviedvać ES», — skazała Rebieka Charms.
«Pra heta my daviedalisia ad našych aŭstryjskich kalehaŭ. Jany mohuć svabodna vyjazdžać za miežy krainy, tady jak na ich lažyć adkaznaść za hvałt u Ukrainie», — raspaviała jeŭradeputat ad Niamieččyny.
Rebieka Charms zaklikała kiraŭnictva ES uvieści sankcyi suprać čynoŭnikaŭ, adkaznych za hvałt suprać mirnych hramadzian padčas masavych akcyj pratestu ŭ Ukrainie.
«Mienavita abmiežavańnia ich ŭjezdu ŭ ES ad nas patrabuje ŭkrainski narod. Hetym asobam nieabchodna ŭvieści vielmi strohi vizavy režym. Zatoje hramadzianam treba palehčyć hety davoli składany praces pradastaŭleńnia dazvołaŭ na ŭjezd u ES», — adznačyła jeŭradeputat.
U sieradu, 5 lutaha, situacyju va Ukrainie majuć namier razhledzieć u čas plenarnaha pasiadžeńnia Jeŭrapiejskaha parłamienta. U čaćvier, 6 lutaha, pa vynikach debataŭ jeŭradeputaty płanujuć pryniać admysłovuju rezalucyju pa ŭkrainskim kryzisie. Akramia taho, na nastupnym tydni ŭ Bruseli adbudziecca narada ministraŭ zamiežnych spraŭ, na jakoj taksama abmiarkujuć situacyju ŭ Ukrainie, paviedamiła Ukrainskaja słužba radyjo «Svaboda».
Paźniej Azaraŭ, Arbuzaŭ i Klujeŭ abvierhli infarmacyju, ahučanuju Rebiekaj Charms. Pres-sakratar jeŭradeputatki paviedamiŭ, što jaje zajavu niapravilna zrazumieli. Padčas pres-kanfierencyi jana skazała, što zhadanyja vyšej słužbovyja asoby Ukrainy mohuć mieć aŭstryjskija pašparty. Padćvierdžańnia hetaha jana na toj momant nie mieła. Niekatoryja ŭkraincy majuć biznes u Aŭstryi, i jeŭradeputatka razam z Partyjaj Zialonych Aŭstryi zrobić aficyjny zapyt da ŭradu Aŭstryi, kab vyśvietlić, ci chtości ź ich maje aŭstryjski pašpart, piša «Ukrainśka pravda».
