Biełaruś zastajecca krainaj z adnym z najbolš represiŭnych miedyjałandšaftaŭ u Jeŭropie, havorycca ŭ novym dakładzie pravaabarončaj arhanizacyi «Indeks cenzury» ab svabodzie ŚMI ŭ Biełarusi, jaki 6 lutaha byŭ prezientavany ŭ Minsku.
Namieśnik staršyni RHA «Biełaruskaja asacyjacyja žurnalistaŭ» (BAŽ) Andrej Bastuniec adznačyŭ, što
za try hady ŭ Biełarusi zafiksavana 105 admoŭ u rehistracyi drukavanych vydańniaŭ.
Na pytańnie, ci jość apošnimi hadami palapšeńni va ŭmovach dziejnaści ŚMI, Bastuniec adkazaŭ: «Usio zaležyć ad taho, z čym paraŭnoŭvać. Bo kali budziem paraŭnoŭvać z 2011 hodam, dyk, zrazumieła, situacyja zaraz vielmi adroźnivajecca, i ŭ stanoŭčy bok. Tady było zafiksavana bolš za sotniu zatrymańniaŭ žurnalistaŭ, byli kryminalnyja pieraśledy, sproby zakryć vydańni.
Zaraz my bačym, što situacyja znachodzicca na nizkim, drennym uzroŭni, ale, va ŭsialakim razie, abychodzicca biez brutalnaha nacisku na miedyja i žurnalistaŭ, jaki byŭ paśla prezidenckich vybaraŭ».
Pavodle słoŭ Bastunca, u 2012 hodzie BAŽ naličyła 60 zatrymańniaŭ žurnalistaŭ padčas ich dziejnaści, u 2013-m — 45. Apošnija dva hady niezaležnyja vydańni pad pahrozu zakryćcia nie traplali, tady jak u 2011 hodzie spyniŭsia vychad «Aŭtaradyjo» i pad pahrozaj zakryćcia byli haziety «Narodnaja vola» i «Naša niva».
«Zrazumieła, što my z napružańniem čakajem vybaraŭ, bo padčas kožnych surjoznych elektaralnych kampanij nacisk na niezaležnyja miedyja ŭ krainie ŭzrastaje. U lubym vypadku i zakanadaŭčyja ŭmovy dziejnaści žurnalistaŭ, i ich stanovišča ŭ krainie nie zdavalnialnyja», — padsumavaŭ namieśnik staršyni BAŽ.
