Mikałaj Statkievič, kandydat u prezidenty Biełarusi na vybarach 2010 hoda, čarhovym razam paćvierdziŭ, što nie maje namieru źviartacca pa pamiłavańnie da Alaksandra Łukašenki. Pra heta havorycca ŭ liście, jaki jon dasłaŭ svajoj žoncy Marynie Adamovič.
Jak paviedamiła žonka palityka, list, datavany 3 lutaha, jana atrymała 8-ha dnia.
Na dumku Statkieviča, pradstaŭnikoŭ ułady zadavoliła b navat jaho «patrabavańnie», a nie prašeńnie ab vyzvaleńni.
Hałoŭnaje — kab na hetaj papiery fihuravała pasada adrasata zvarotu, ličyć jon.
«Kali prosiš pamiłavańnia, to pryznaješ siabie vinavatym u lubym vypadku, a ja siabie vinavatym nie liču, — pryvodzić frahmienty lista sajtwww.statkevich.org. — Pa sutnaści, ź mianie dva z pałovaj hoda vyciskajuć zajavu ab pryznańni lehitymnaści (majecca na ŭvazie lehitymnaść prezidenctva Łukašenki). Ale ja indulhiencyjami nie handluju. Navat kali mnie prapanoŭvajuć u jakaści apłaty maju ŭłasnuju svabodu. Nie dačakajucca».
Statkievič nahadaŭ, što pieršy raz napisać prašeńnie ab pamiłavańni jamu prapanavali jašče vosieńniu 2011 hoda, namiakajučy pry hetym, što pryznavać vinu nie abaviazkova.
A ŭ Mahilovie ŭ červieni 2012 hoda ab hetym havaryli «pramym tekstam». Nie dačakaŭšysia patrebnaj papiery, Statkieviču pahražali tym, što prašeńnie ad jaho imia moža być padroblena, piša palityk.
Piacidziesiacisiamihadovy Mikałaj Statkievič — adziny kandydat u prezidenty, jaki dahetul znachodzicca ŭ źniavoleńni. Vyjści z-za krat jon pavinien u śniežni 2016 hoda.