Hienieralny dyrektar Pieršaha kanała Kanstancin Ernst pryhraziŭ padać u sud na śpiavačku Ziemfiru Ramazanavu ŭ vypadku, kali jana źvierniecca z pazovam z nahody vykarystańnia jaje pieśni ŭ cyrymonii adkryćcia Alimpijskich hulniaŭ u Sočy. Pra heta Ernst zajaviŭ u efiry «Echo Moskvy».
Pavodle jaho słoŭ, Ziemfira «piać ci siem hadoŭ tamu» parušyła ŭmovy kantraktu z hukazapisvalnaj kampanijaj Real Records, jakoj u toj čas kiravaŭ Ernst. Hiendyrektar Pieršaha kanała adznačyŭ, što tady jon nie staŭ padavać u sud, «daravaŭšy joj heta parušeńnie», adnak u vypadku, kali Ziemfira vykanaje svajo abiacańnie źviarnucca ŭ sud z nahody vykarystańnia svajoj pieśni, to spravie moža być dadzieny chod.
Ernst raspavioŭ, što niekalki razoŭ telefanavaŭ Ziemfiry, adnak jana nie brała słuchaŭku. «Ja dumaju, što dla Ziemfiry, dla jaje karjery zrabiŭ vielmi šmat. I takaja drobiaznaść, mnie zdajecca, takuju vydatnuju śpiavačku prosta hańbić», — zajaviŭ jon i vykazaŭ mierkavańnie, što zajavy Ziemfiry ab pazovie z nahody pieśni ŭ cyrymonii adkryćcia Hulniaŭ- 2014 źjaŭlajecca jaje žadańniem pryciahnuć da siabie ŭvahu na fonie cikavaści da spartyŭnaj padziei.
Ab jakim mienavita parušeńni kantrakta idzie havorka, Ernst, jaki vystupiŭ u roli pradziusara i aŭtara scenaryja cyrymonii adkryćcia Alimpijady, nie patłumačyŭ. Ziemfira była źviazana kantraktam z Real Records da 2007 hoda.
