fota Siarhieja Hudzilina
Hatel «Kiempinski» nie pabudujuć da Čempijanatu śvietu pa chakiei, ale horad da hetaha stavicca «narmalna». Haścinica hetaja nieabchodnaja stalicy ŭ lubym vypadku, upeŭnieny mer Minska Mikałaj Ładućka: «Znachodziciesia vy ŭ Kiejptaŭnie, a ŭ daviedniku, jaki lažyć u vas u numary, budzie hatel «Kiempinski» ŭ horadzie Minsku». Akramia taho, u stalicu Biełarusi moža pryjści i hatel «Redysan».
Mikałaj Ładućka skazaŭ, što ŭ vypadku z «Kiempinski» da zatrymki budaŭnictva jon stavicca «narmalna».
«Nie treba być budaŭničym inžynieram, ale treba ŭjaŭlać usie miechanizmy i padvodnyja płyni. A padvodnyja płyni ŭ tym, što heta stała na bierazie Śvisłačy. I pad budynkami, jakija tam znachodziacca, isnujuć 3 pavierchi — parkinhi», — tłumačyć Mikałaj Ładućka.
«Była zaprošanaja śpiecyjalnaja kampanija z Zaparožža, jakaja maje vialiki dośvied u budaŭnictvie hidratechničnych zbudavańniaŭ. Jany mietadam apuskańnia bietonu spačatku zrabili čarnavuju abojmu, i kali pačali rabić hetuju pracu, paŭstała stolki składanaściaŭ pa śvidravańni, stolki prablem!
Jak haścinicu «Jeŭropa» kali budavali, taksama dumali: pabudujem za 2 miesiacy, ale tam padmurak rabili hod, łamalisia mašyny, bury łamalisia! Toje samaje atrymałasia tut. My dumali, pabudujem padmurak za paŭhoda, parkinh zapuścim, a atrymałasia, što na jaho syšoŭ hod.
Potym u hetym čarnavym katłavanie, bietonnaj abojmie, kali ad vady adharadzilisia, zrabili čystuju ścienku. Potym hidraizalacyju zrabili, potym pastavili čystuju ścianu ŭžo parkinha, potym zabietanavali pierakryćci i pajšli».
Mikałaj Ładućka raskazvaje: vydatki budaŭničaha pracesu adbylisia praz «najskładaniejšyja hidratechničnyja ŭmovy, jakija niemahčyma było praduhledzieć na stadyi pryniaćcia rašeńniaŭ pa terminach realizacyi prajekta».
Staršynia Minharvykankama paviedamiŭ, što ŭ zamiežnaha padradčyka, jaki spačatku zajmaŭsia abjektam, «nie pajšła praca».
Ciapier padradčykam vystupaje AAT «Minskprambud», jaki budavaŭ «Minsk-Arenu» i «Čyžoŭka-Arenu». Jon raźličvaje, što haściničny kompleks budzie ŭviedzieny da kanca hetaha hoda.
«Dla nas hety prajekt z punktu hledžańnia naroščvańnia pasłuh nieacenny.
Hateli «Kiempinski» znachodziacca ŭ 140 krainach śvietu.
Znachodziciesia vy ŭ Kiejptaŭnie, a ŭ daviedniku, jaki lažyć u vas u numary, budzie hatel «Kiempinski» ŭ horadzie Minsku. Dla nas heta pryncypova važna, i my adkryvajem siońnia siabie…»
Mer Minska kaža, što pra techničnyja składanaści ŭźviadzieńnia «Kiempinski» «nichto nikoli nie raskazvaŭ».
«Ja tam płaniorak 5-6 pravodziŭ, u toj składany pieryjad, kab paskoryć praces, tamu što zatrymka była vielmi surjoznaja. Siońnia viadziecca ablicoŭvańnie, śvietły naturalny kamień užyvajecca na fasadzie, i chaču skazać, što abličča mianiajecca. Nie treba śpiašacca z vysnovami, jak niekatoryja našy architektary siońnia robiać».
Taksama kiraŭnik Minharvykankama raskazaŭ, što vioŭ pieramovy z pradstaŭnikami jašče adnaho bujnoha haściničnaha apieratara — hatela «Redysan».
«Nie ŭ kožnuju krainu apieratary haściničnyja iduć, jany ž praličvajuć, tamu što ich imia kaštuje hrošaj.
I toje, što ŭ nas siońnia haścinica budujecca pad hetym imiem, kaža pra davier, pra pierśpiektyvu i pra toje, što ŭ nas jość turysty i što ŭ nas jość što demanstravać».
Mikałaj Ładućka dadaŭ, što akramia «Kiempinski» ŭ Minsku buduć pabudavanyja haścinicy «Chajat» i «Redysan».
Što da «Kiempinski», to Mikałaj Ładućka dadaŭ, što rašeńnie pra budaŭnictva hetaha hatela, mabyć, było nie samym papularnym, ale Alaksandr Łukašenka pryniaŭ jaho, «kirujučysia najvyšejšymi mierkavańniami, kirujučysia intaresami stalicy na dziesiacihodździe napierad».
