Vykanaŭca abaviazkaŭ prezidenta Ukrainy Alaksandr Turčynaŭ źviarnuŭsia da prezidenta Rasii Uładzimiru Pucinu z patrabavańniem spynić pravakacyi ŭ Krymie.
«Ja asabista źviartajusia da prezidenta Pucina z patrabavańniem nieadkładna spynić pravakacyju i adklikać vajskoŭcaŭ z Aŭtanomnaj Respubliki Krym i pracavać vyklučna ŭ ramkach padpisanych pahadnieńniaŭ», — zajaviŭ jon na bryfinhu va ŭkrainskim parłamiencie ŭ piatnicu viečaram.
A.Turčynaŭ nahadaŭ U.Pucinu, što razam z ZŠA i Vialikabrytanijaj Rasija źjaŭlajecca harantam niedatykalnaści i cełasnaści terytoryi Ukrainy [Budapiešcki miemarandum 1994 hoda].
«Pa zvarocie Viarchoŭnaj Rady i maim asabistym zvarocie ciapier prachodzić pasiadžeńnie Rady Biaśpieki AAN. Uvieś cyvilizavany śviet padtrymlivaje Ukrainu», — paviedamiŭ Turčynaŭ.
«Jany pravakujuć nas na vajenny kanflikt, pa dadzienych našaj vyviedki, jany adpracoŭvajuć scenar, jaki całkam anałahičny abchazskamu. Kali, spravakavaŭšy kanflikt, jany pačali aneksiju terytoryj», — padkreśliŭ kiraŭnik dziaržavy.
A.Turčynaŭ raspavioŭ, što Rada nacyjanalnaj biaśpieki i abarony Ukrainy adpracavała płan narmalizacyi situacyi na paŭvostravie Krym.
«My patrabujem spynić pravakacyju, my patrabujem narmalizavać situacyju. My ŭpeŭnienyja, što Ukraina zachavaje svaju terytoryju, Ukraina abaronić niezaležnaść i lubyja sproby aneksii, uvarvańnia, buduć mieć vielmi surjoznyja nastupstvy», — zajaviŭ v.a. prezidenta Ukrainy.
