Niekatoryja rasijskija ŚMI volna vytłumačyli heta jak «dokaz» taho, što snajpiery byli naniatyja apazicyjaj.
Ministr zamiežnych spravaŭ Estonii Urmas Paet, paćvierdziŭšy sapraŭdnaść zapisu, patłumačyŭ na bryfinhu ŭ sieradu, što jon tolki pierakazvaŭ viersiju, pra jakuju jamu kazała 25 lutaha ŭ Kijevie hramadski dziejač, doktar Volha Bahamolec.
U telefonnaj razmovie z Ketryn Eštan Urmas Paet paviedamiŭ, što, pa słovach Bahamolec, milicyjanty i demanstranty, što stali achviarami snajpierskaha ahniu, mahli być, miarkujučy pa «počyrku», zastrelenyja adnymi i tymi ž snajpierami.
«Jana pakazała mnie peŭnyja fatahrafii, jana skazała […], što heta adzin počyrk, adzin typ kul, i ŭžo vyklikaje niespakoj, što novaja kaalicyja nie choča rasśledavać, što mienavita adbyłosia, tamu ŭsio macniejšaje i macniejšaje razumieńnie, što za snajpierami stajaŭ nie Janukovič, a niechta z hetaj novaj kaalicyi», — kaža Paet u telefonnaj razmovie, dadajučy, što kali hetyja plotki pačnuć žyć svaim žyćciom, heta z samaha pačatku dyskredytuje novuju kaalicyju.
«Ja zaklikaju žurnalistaŭ vielmi ŭvažliva pastavicca da hetaha zapisu: ja kazaŭ tolki pra toje, jakija viersii chadzili pra zdareńnie va Ukrainie», — skazaŭ estonski ministr žurnalistam na bryfinhu 5 sakavika.
Volha Bahamolec skazała ŭ sieradu žurnalistam, što jana, pa-pieršaje, nie kazała Paetu pra zabitych z abodvuch bakoŭ, bo nie bačyła ciełaŭ zabitych milicyjantaŭ.
Pa-druhoje, pa słovach Bahamolec, jana nie vykazvała mierkavańnia, što kiravać snajpierami na Majdanie moh chto-niebudź z apazicyjanieraŭ.
«Ja liču, niešta takoje možna kazać, tolki abapirajučysia na fakty», — skazała Bahamolec brytanskaj haziecie Daily Telegraph.
Hutarka Paeta i Eštan adbyłasia 26 lutaha. Estonski ministr vykazaŭ zdahadku, što zapis hutarki raźmiaścili ŭ internecie mienavita ciapier, kab dyskredytavać novy ŭrad Ukrainy.
Volha Bahamolec skazała haziecie Daily Telegraph, što rasśledavańnie, jak zapeŭnivaje ŭrad, praciahvajecca, ale padrabiaznaściaŭ ab jaho chodzie jana nie viedaje.
Zapis razmovy Paeta i Eštan raźmiaściŭ u sieradu na YouTube karystalnik pad nikam Expertise Centre of the Russian Federation.
Rolik supravadžajecca podpisam, ź jakoha vynikaje, byccam Urmas Paet «raskryvaje šakavalnuju infarmacyju, jakaja paćviardžaje čutki ab tym, što snajpiery byli naniaty lidarami Majdana».
Zhodna z podpisam, razmovu padsłuchali supracoŭniki ŭkrainskaj śpiecsłužby SBU.
Rolik tut ža byŭ znojdzieny rasijskim dziaržaŭnym telekanałam Russia Today, jaki paviedamiŭ u zahałoŭku svajoj naviny pra heta, što «Eštan dakładvali, što Janukovič nie byŭ datyčny da zabojstvaŭ ludziej na Majdanie».
Kiraŭnik kamiteta rasijskaj Dziarždumy pa mižnarodnych spravach Alaksiej Puškoŭ napisaŭ u Twitter, što Paet «skazaŭ, što za snajpierami, jakija stralali pa pratestantach, stajała apazicyja».
Zatym jašče niekalki rasijskich ŚMI paviedamili ŭžo ŭ całkam śćviardžalnaj formie, byccam Paet kazaŭ ab najaŭnych dokazach taho, što snajpieraŭ naniaŭ chtości ź lidaraŭ apazicyi.
Viersija ab «trecim boku», u tym liku i pra snajpieraŭ, jakija stralali ŭ abodva baki na Majdanie 18-20 lutaha, cyrkulavała ŭ Kijevie z samaha pačatku sutyknieńniaŭ z prymianieńniem bajavoj ahniastrelnaj zbroi. Adnak pierakanaŭčych dokazaŭ na jaje karyść da hetaha času pradstaŭlena nie było.
