«Miensk», jaki my niezvarotna zhubili

Zachar Šybieka

U sieradu ŭ zbrojnaj zali Nacyjanalnaha muzeju historyi i kultury Biełarusi prajšła prezentacyja knihi historyka Zachara Šybieki «Minsk' sto hadoŭ tamu».

Pasłuchać navukoŭca i prafesara historyi pryjšło bahata ludziej. Arhanizataram navat daviałosia prynosić lišnija kresły, kab usie žadajučyja mahli sieści. Ale častka ludziej usio adno stajała ŭ prachodach. Było šmat moładzi, na prezentacyju pryjšli studenty prafesara Šybieki, što navučajucca ŭ BDEU, jakija paśla imprezy ščyra dziačyli svajmu vykładčyku za cikavyja apoviedy. Była navat zdymačnaja hrupa telekanału ONT.

Kniha Zachara Šybieki «Minsk' sto hadoŭ tamu» vyjšła ŭ dziaržaŭnym vydaviectvie «Biełaruś». Aŭtar adznačyŭ, što jamu vielmi pryjemna, što prezentacyja adbyvajecca mienavita ŭ hetych ścienach: «Akurat u hetym muzei ja znajšoŭ bahata zdymkaŭ, jakija i lehli ŭ asnovu knihi, — kaža historyk.

— Heta kniha pra staronki historyi našaha horadu, jaki prajšoŭ šlach ad šarahovaha hubernskaha horadu Rasiejskaj imperyi da stalicy niezaležnaj dziaržavy. Kniha łučyć usich mienčukoŭ. Jana pra ščaście i hora, pra žyćcio jakoje viravała tut sto hadoŭ tamu. Asabista ŭ mianie čytańnie hetaj knihi vyklikaje radasnyja i śvietłyja pačućci. Spadziajusia, što takija samyja pačućci jana vykliča i ŭ maich čytačoŭ».

Zachar Šybieka adznačyŭ, što heta kniha viartaje nas da časoŭ kapitalistyčnych adnosin, kali navat mienski ślesar ci mechanik moh mieć doma prysłuhu.

«Taksama kniha viartaje nam charastvo kolišnich damoŭ i kvartałaŭ Miensku, siadziby, sady, harody. Siońniašni čas vydatna padkreślivaje, što novaje, jakoje stavicca na miescy staroha, zusim nia lepšaje», — skazaŭ Z.Šybieka.

Historyk Andrej Kištymaŭ skazaŭ, što heta kniha napamin nam pra «horad, jaki my niezvarotna zhubili». Prafesar Adam Maldzis adznačyŭ, što tvory Zachara Šybieki zaŭsiody čytajucca lohka i paznavalna. Uładzimier Arłoŭ raskazaŭ, što najbolš cikavymi ŭ knizie «Minsk' sto hadoŭ tamu» jamu bačacca partrety žyvych ludziej. «Takich, jak haradzki načalnik Karal Čapski, jak šuler Kako, jak miaščanka Matrona Maroskaja» — skazaŭ U.Arłoŭ.

Naprykancy prezentacyi Zachar Šybieka nie schacieŭ adkazvać na pytańni hledačoŭ, paraiŭšy ŭsio adkazy šukać pad vokładkaj knihi.

Nabyć bahata ilustravanuju knihu možna ŭ staličnych kniharniach.

Źmicier Pankaviec