Studenty biełaruskich VNU raspaviali partału Tribuna.com, jak ich vysialali ź internataŭ dziela turystaŭ i pra ŭmovy, u jakich buduć žyć hości minskaha čempijanatu śvietu pa chakiei.
«Kryŭdna, što budučyniu krainy vysialajuć dziela niejkaha čempijanatu»
Jula, studentka 3-ha kursa MDŁU
«Pra toje, što nas buduć vysialać, daviedalisia daŭnym-daŭno ź internetu, ale dakładnaj infarmacyi doŭhi čas nie było. Miesiac tamu pryjšła vychavalnica i skazała, što pavinny źjechać da 10 krasavika. Ale kudy i jak, nichto nie paviedamiŭ. Apaviaścili tolki, što reziervovaje miesca budzie va ŭsich. Studentaŭ z našaha internata buduć padsialać da studentaŭ miedycynskaha internata pa susiedstvie. Pry hetym sialić buduć u navučalnyja pakoi! Umovy nie samyja pryjemnyja i nie kožnamu padyduć. Šmat kamu davodzicca šukać kvatery. A heta prablema — ich usio raźbirajuć i ceńnik niemaleńki. Ja sabie miesca ŭ internacie pakinu, ale, chutčej za ŭsio, budu žyć u siabroŭki. Chadzić u duš u błok da nieznajomych ludziej abo hatavać u ich na kuchni mianie nie nadta vabić.
Dla studentaŭ umovy pražyvańnia ŭ internacie niadrennyja. A voś nakont turystaŭ nie viedaju… Heta nie hatelnyja numary. Ale kali zdavać jak chostieły, to budzie ništavata. U błoku dva pakoi, duš, tualet, kuchnia. Adzinaje, duchoŭki nie chapaje. Prusaki? Niama. My dziaŭčaty akuratnyja i da padobnaha nie davodzili. Praŭda, zimoj zdorava «sifoniła» z voknaŭ i było žudasna choładna. Ale idzie leta, dumaju, nie źmierznuć.
Z-za ŭsiaho hetaha staŭleńnie da chakieja i čempijanatu śvietu nie pamianiałasia. Jano jak było indyfierentnaje, tak i zastałosia. Troški kryŭdna, što studentaŭ, budučyniu krainy, vysialajuć dziela niejkaha čempijanatu. U inšych krainach, dzie pravodziacca bujnyja čempijanaty, turysty žyvuć u namiotavych miastečkach, i studentaŭ nichto nie kranaje.
I kali zamiežnikam pašancuje, u Minsku jany mohuć sustreć absalutna adekvatnych i, jak ciapier modna kazać, jeŭrapieizavanych ludziej. Ale časam traplajucca niehatyŭnyja kadry, i z-za takich, zvyčajna, i składvajecca niehatyŭnaje ŭražańnie pra krainu».
«Prapanoŭvajuć raskładušku ŭ čužym błoku»
Anton, student 1-ha kursa BNTU (pa prośbie studenta imia źmieniena)
«U pačatku hoda nam vydali propuski, jakija dziejničajuć da 2 krasavika, i abiacali dać miescy ŭ inšych internatach BNTU naŭzamien. Ale ničoha takoha i blizka niama! Kali i prapanujuć, to raskładušku ŭ poŭnym čužym błoku! Ja admoviŭsia, i pakul budu žyć z bratam, ale jość chłopcy, jakija ciapier kožny dzień jeździać na vučobu z Maładziečna abo Žodzina. A na patoku jość chłopiec, jaki da hetaha času naohuł ničoha nie znajšoŭ. A da 15.00 sierady ŭsie abaviazanyja byli vysielicca. Nie viedaju, što ź im budzie.
Što datyčycca ŭmoŭ, to dumaju, zamiežnikam budzie dobra. Vannaja, prybiralnia i kuchnia ŭ błoku.
Staŭleńnie da chakieja i da čempijanatu śvietu nie pamianiałasia. Mianie bolš raźjušyła, što nas vysialajuć ledź što nie na volu losu i biez asablivaj dapamohi z boku kiraŭnictva».
«U internacie niama navat elemientarnych zaščapak u prybiralni i vannaj»
Ania, studentka 3-ha kursa BDU
«Pra vysialeńnie havaryłasia z samaha pačatku zasialeńnia ŭ internat. Žyć tam pavinny byli da 4 krasavika. Było jasna, što abjekty ŭžo pradali i daŭno. Ale nichto nie viedaŭ padrabiaznaściaŭ. A čamu ciahnuła administracyja studharadka, ja nie razumieju. Učora ŭ hrupie našaha internata «Ukantakcie» źjaviłasia abjava ad dyrektara studharadka, što studentaŭ buduć raśsialać pa roznych internatach, jak BDU, tak i inšych navučalnych ustanoŭ. U pieraliku byli i internaty PTV. Hod ŭviadzieńnia ŭ ekspłuatacyju adnaho ź ich — 1966! Dźviery začyniajucca na zamok u 11 hadzin. A ŭ nas časam pary da 9-10 viečara. Dy i kantynhient… Samaje cikavaje, što miescy ŭ inšych internatach VNU jość. Uvohule, u lubym vypadku my zastajemsia ŭ durniach. Ja budu šukać sabie miesca žycharstva ŭ zaležnaści ad taho, kudy mianie pierasielać. Kali heta budzie internat BDU, to čamu b nie pažyć dva miesiacy. Ale kali heta budzie internat PTV, to budu abo kožny dzień jeździć dadomu, ci kantavacca ŭ siabroŭ, ci zdymać kvateru ź siabroŭkami. A heta lišnija vydatki. Pryjdziecca brać hrošy ŭ baćkoŭ. A hetaha rabić nie chočacca.
Umovy? Dla nas usio było supier. Internat novy, tolki-tolki zdadzieny ŭ ekspłuatacyju. Ale nie dumaju, što zamiežnikam budzie vielmi kamfortna. Tam niama navat elemientarnych zaščapak ŭ prybiralni i vannaj!
Da chakieju zaŭsiody staviłasia niejtralna. Dy i da taho, što ŭ Minsku projdzie suśvietny čempijanat, taksama. Mianie ciapier pastajanna mučyć pytańnie: za što nas, studentaŭ svajoj VNU i svajoj krainy, pierasialajuć u niezrazumiełyja ŭmovy?
A zamiežniki sami ŭsio zrazumiejuć, kali pryjeduć da nas. Adny tolki lustranyja stoli ŭ prybiralniach na «Čyžoŭka-Arenie» čaho vartyja».
«Zahad, pa jakim nas vysialali, byŭ aformleny zadnim čysłom»
Dźmitryj, student 5-ha kursa BDUIR
«U siaredzinie sakavika na ŭsich pavierchach majho internata źjavilisia niečakanyja abjavy, što da kanca miesiaca ŭsie piacikurśniki pavinny vyzvalić svaje pakoi. A na našy miescy pavinny pryjechać pierasialency ź inšaha internata, u jakim i buduć žyć zamiežnyja turysty. Mabyć, VNU paličyŭ, što piacikurśniki sami zmohuć znajści sabie žyllo ŭ pošukach i nie dapamahaŭ. Dy i sam zahad, pa jakim nas vysialali, byŭ aformleny zadnim čysłom. U vyniku źniaŭ ź siabrami kvateru i zamiest 100 tysiač rubloŭ u miesiac, ciapier addaju za žyllo 200 dalaraŭ.
Asnoŭny niehatyŭ ad usioj hetaj historyi i blizkaha čempijanatu śvietu ŭ tym, što ab padobnych mierach treba papiaredžvać zahadzia. U astatnim usio ŭ paradku. Staŭleńnie da chakieja nie asabliva pamianiałasia. Dy i nie mahu nazvać siabie jaho amataram. Futboł bližej.
Što b raspavioŭ zamiežnikam pra krainu? U Biełarusi žyvuć dosyć dobryja i vietlivyja ludzi, hatovyja dapamahčy, padkazać. I nie dumaju, što chtości admović zamiežniku ŭ dapamozie znajści darohu».
«Naša internat budzie pryroŭnieny da trochzorkavaha chosteła»
Volha, studentka 5-ha kursa BDPU imia. M. Tanka
«Nam pastajanna pieranosili terminy vysialeńnia: luty, sakavik, krasavik. I ŭ vyniku ŭsio vyjšła biazładna i pa-saviecku. U administracyi internata było žadańnie chutčej ad nas pazbavicca — chutčej vysialajciesia i valicie adsiul. Asabliva nie zadumvalisia, kaho kudy pierasialać. Ja damahłasia, kab mnie dali narmalny internat, a pieršakurśnikaŭ adpravili tudy, dzie adzin duš na pavierch.
Naš internat budzie pryroŭnieny da trochzorkavaha chosteła. Ja naohuł nie viedaju, ci jość u chostełaŭ zorki, ale budynak unutry davoli «pajezdžany» studentami. Zrešty, sami ŭmovy niadrennyja. Błok z dvuch pakojaŭ z asobnaj kuchniaj (plita, stoł, chaładzilnik) i paasobnym sanvuzłom. Kuchnia — heta supierbonus našaha internata.
Jak reahavała na vymušany pierajezd z-za čempijanatu śvietu? Spakojna. Moža, adzin raz, kali pieravoziła rečy, vyłajałasia matam. A tak — mnie ŭsio roŭna. Na chakiei ja była ŭsiaho adzin raz i na matčy čempijanatu ŭsio roŭna chadzić nie źbirałasia. Prosta chaciełasia, kab kiraŭnictva VNU bolš uvažliva staviłasia da studentaŭ.
Zamiežnikam ža raskazała b, što biełarusy dobryja i adkrytyja, što ŭ nas pryhožaja mova i smačna hatujuć. Pakazała b našu samabytnaść i kulturu, a nia hetaha płastykavaha «zubra Valeru» ci jak tam jaho kličuć».
