Usie budaŭniča-mantažnyja raboty ŭ staličnym akvaparku «Lebiadziny», jaki znachodzicca na vadaschoviščy Drazdy, zavieršanyja, paviedamiŭ 2 krasavika namieśnik načalnika inviestycyjnaha ŭpraŭleńnia DVA «Minskbud» Alaksandr Kračko.
«Zaraz viaducca puskanaładačnyja raboty 16 horak, basiejny ŭžo napaŭniajucca vadoj, pa 20 sm u dzień, — zaznačyŭ jon. — 5 krasavika da nas prylatajuć mižnarodnyja ekśpierty siertyfikacyi TIUF, jakija i vydaduć pieršyja rekamiendacyi pa vyprabavańniach akvaparku».
Akvapark płanujecca adkryć dla naviedvalnikaŭ 1 maja. Usiaho tut budzie 16 horak i atrakcyjonaŭ, dva centry — dziciačy i siamiejny, dzie raźmieściacca spa-kompleks, trenažornaja zała, sauny, zona hramadskaha charčavańnia, dziciačaja zabaŭlalnaja zona. U interjery budzie šmat zialonaha dekoru — palmy, visiačyja lijany i inšaje. U daždžavych hrotach — imitacyja skał, ź jakich ciače vada, z padłohi budzie ŭźnimacca para, pavietra budzie aramatyzavanaje. Unutry trub horak praviedziena śviatłodyjodnaja padśvietka, praduhledžana muzyka.
U vialikuju spa-zonu ŭvachodziać vosiem łaźniaŭ. Aprača ruskaj parylni, finskaj saŭny, tureckaha chamama tut buduć i łakonium (suchaja łaźnia), tepidaryum (fizijałahična rehienieryrujučaja), kałdaryum (ciepłavaja kabina z pavyšanaj vilhotnaściu i tempieraturaj 37—45 °S), a taksama salany i «śniežny» pakoi. Pobač — kabiniety rełaksacyjnych, antystresavych, adnaŭlajučych spa-prahram.
Na bazie akvaparku pabudavany amierykanski atrakcyjon «Dark rajd», jaki prapanoŭvaje ažyćciavić mižhałaktyčnaje padarožža na inšuju płanietu.
