Siarod tych, chto zahinuŭ, kožny treci byŭ pijany. Piataja častka trahiedyjaŭ adbyłasia praz parušeńnie pracoŭnaj dyscypliny. Inšyja pryčyny: niavykanańnie kiraŭnikami instrukcyjaŭ pa achovie pracy, nieaściarožnaść, sastarełaje abstalavańnie, adsutnaść srodkaŭ indyvidualnaj abarony, drenny stan pracoŭnaha miesca.
U ministerstvie kažuć, što možna navat skłaści rejtynh samych niebiaśpiečnych prafesyjaŭ. Jak ni dziŭna, na pieršaj pazycyi ŭ im — vartaŭniki. Ludzi pijuć na pracoŭnych miescach i pamirajuć ad pieradaziroŭki, albo zasynajuć z zapalenaj cyharetaj i hinuć u ahni pažaru…
‑‑ Zdarajecca j takoje, što ciažka adrazu vyśvietlić, ad čaho čałaviek zahinuŭ, ‑‑ kaža načalnik adździełu analityčnaha zabieśpiačeńnia Departamentu dziaržaŭnaj inspekcyi pracy Alaksandar Talerčyk. — Niadaŭna vartaŭnik, jaki paśviŭ karoŭ, zhareŭ u svaim vahončyku. Dumali, śmierć nastupiła ad ahniu. Ale ž paśla vyśvietliłasia, što ŭ jaho ŭ kryvi ‑‑ 4,9 pramilaŭ alkaholu. A heta jak try butelki harełki! Inšy byŭ vypadak, kali pijany vartaŭnik palez u transfarmatar pa miedziany drot. Jaho zabiła tokam…
Nahadajem, va ŭsim śviecie samymi niebiastpiečnymi prafesyjami ličacca šachtory, palicejskija dy žurnalisty. U Biełarusi rejtynh inšy ‑‑ kiroŭcy, mantažniki, mulary, cieślary, i tyja ž šachtory… Kožny dvaccaty čałaviek hinie pa vinie inšych. Naprykład, kranaŭščyk apuskaŭ hruz i nie zaŭvažyŭ kalehu… Admysłoŭcy Departamentu kažuć, što bolšaść trahiedyjaŭ možna było b paźbiehnuć. Naprykład, na adnoj budaŭničaj placoŭcy čałaviek zvaliŭsia u niezatulenuju dzirku ŭ padłozie. Jak vyśvietliłasia paśla, jon sam byŭ adkaznym za techniku biaśpieki na hetym abjekcie…
Razam z usim, supracoŭniki departamentu padkreślivajuć, što ŭ paraŭnańni z adpaviednym pramiežkam minułaha hodu śmiarotnaść pamieńšyłasia na 14 adsotkaŭ.
