Try hady tamu ŭ ZŠA startavaŭ Good Judgment Project (prajekt «Zdarovy sens»), u miežach jakoha 3 tysiačy čałaviek sprabujuć pradkazać budučyniu. U niekatorych heta atrymlivajecca lepiej, čym u śpiecyjalistaŭ z CRU.
Inicyjataram prajektu stała IARPA (Ahienctva pieradavych raźviedvalnych daśledčych prajektaŭ). Jaho meta — vyjavić alternatyŭnyja mietady prahnazavańnia, u pryvatnaści, u śfiery palityki. IARPA vyrašyła spraŭdzić viadomy ŭžo bolš za sto hod t.zv. «fienomien mudraści natoŭpu», zhodna ź jakim, kali sabrać mieravańni vialikaj hrupy ludziej i zrabić ź ich siaredniaje, to mierkavańnie hetaje budzie nadzvyčaj trapnym.
Kiruje prajektam Filip Tetłak — psichołah, palitołah, prafiesar Piensilvanskaha ŭniviersiteta. Dobraachvotniki (siarod jakich studenty i daktary, inžyniery i chatnija haspadyni) analizujuć prapanavanuju infarmacyju i namahajucca na jaje asnovie pradkazać važnyja padziei, zapaŭniajučy admysłovyja ankiety na kampjutery. Kožny ŭdzielnik atrymlivaje śpiecyjalny rapart, jaki dazvalaje jamu acanić svoj prahres — što, na dumku Tetłaka, istotna pavyšaje jakaść prahnozaŭ. Za pravilnyja adkazy ahienctva płocić hrošy.
Z troch tysiač udzielnikaŭ prykładna 1% vyłučajecca nadzvyčaj dobrymi vynikami. Ich prahnozy na 30% lepšyja, čym u aficeraŭ vyviedki, jakija majuć dostup da sakretnaj infarmacyi. Siarod takich «supierprahnazistaŭ», naprykład, 60-hadovaja Elejn Ryč, farmaceŭtka z Merylenda.
Jana ź niejmaviernaj dakładnaściu adkazvaje na pytańni kštałtu «chto pieramoža na parłamienckich vybarach u Jehipcie» i «ci ŭvojdzie rasijskaja armija na terytoryju Ukrainy». Ryč pryznajecca, što, pierš čym dać adkaz, vyvučaje temu z dapamohaj Huhła.
Good Judgment Project — ekśpierymient, jaki paŭstaŭ u vyniku niaŭdač dziaržaŭnych ahienctvaŭ ZŠA. Štatnyja analityki z dobrym zarobkam akazalisia nie ŭ stanie pradbačyć, naprykład, ataku na Suśvietny handlovy centr u Ńju-Jorku. Moža, tamu, što ŭradavyja ekśpierty nie mohuć u dastatkovaj stupieni dystancyjavacca ad dadzienych, schilnyja da cisku zacikaŭlenych u tym ci inšym pryjarytecie kaleh i panujučych u ich kołach mierkavańniaŭ.
Vidavočna, što amierykanskaj vyviedki prajekt nie zamienić. Ale stać da jaje dobrym dadatkam maje ŭsie šancy.
