Alaksandr Łukašenka daručyŭ u ramkach kryminalnych spraŭ razabracca z faktami biezhaspadarčaści na Słuckim miasakambinacie i Słuckim ilnokambinacie.
Alaksandr Łukašenka ŭ čas naviedvańnia RUP «Słuckija pajasy» pacikaviŭsia ŭ hubiernatara Minskaj vobłaści prablemnymi pradpryjemstvami ŭ Słucku. Siamion Šapira adznačyŭ, što naściarožvaje praca miascovaha miasakambinata, na jakim drennaja ekanamičnaja situacyja i straty.
Łukašenka pryniaŭ rašeńnie źjeździć na hety miasakambinat, a taksama naviedać lnokambinat, što pieršapačatkova prahramaj rabočaj pajezdki ŭ Słuck zapłanavana nie było.
Prybyŭšy na lnokambinat, Alaksandr Łukašenka aburyŭsia poŭnaj biezhaspadarčaściu: terytoryja pradpryjemstva vyhladała brudnaj i nieprybranaj, paŭsiul u vializnyja kučy była składziena syravina, u adnym z pamiaškańniaŭ zvalena technika.
«My kryŭdzimsia na sialan, što jany nie mohuć dać trasty. A jak vy jaje tut zachoŭvajecie?! Kudy vy składajecie heta syravinu? Vy ž navat nie skłali hetyja rułony, jak treba, — skazaŭ jon.
— Jak možna tak zachoŭvać lon?! Čamu vy ŭsio heta nie pierapracoŭvajecie? Kudy vy budziecie straty dziavać?».
«Poŭny bardak, haspadara niama, nikomu heta, adčuvaju, nie treba», — adznačyŭ jon.
«Raspačynajcie kryminalnuju spravu i mnie dakładvajcie», — padkreśliŭ Łukašenka, źviartajučysia da staršyni Kamiteta dziaržaŭnaha kantrolu Alaksandra Jakabsona.
Alaksandr Łukašenka taksama rasparadziŭsia z zaŭtrašniaha dnia nakiravać na pradpryjemstva dyrektaram staršyniu kamiteta pa sielskaj haspadarcy i charčavańni Minskaha abłvykankama.
«Raźbiaryciesia ŭ ramkach kryminalnaj spravy pa ŭsich pytańniach i dakładzicie, kali pavinna być skončana madernizacyja, dzie novaje abstalavańnie. Moža być, jano valajecca, jak hetyja traktary i syravina», — daručyŭ Łukašenka staršyni KDK.
«Da 1 vieraśnia tut usio pavinna być vylizana. Zrabicie narmalny lnozavod», — skazaŭ jon, dadaŭšy, što heta tyčycca nie tolki pradpryjemstvaŭ u Słucku.
«Heta što takoje? U nas paśla vajny takoha nie było!» - aburyŭsia Łukašenka.
Zatym Alaksandr Łukašenka pierajechaŭ na druhoje prablemnaje pradpryjemstva — Słucki miasakambinat. Tut jon źviarnuŭ uvahu na adsutnaść naležnaha paradku i nieprystojnyja ŭmovy, u jakich zachoŭvajecca miasa.
Alaksandr Łukašenka prajšoŭ pa terytoryi kambinata, zazirnuŭ u niekalki chaładzilnych pamiaškańniaŭ, u jakich lažali tušy.
«Tut ža dychać niama čym! I hetym vy budziecie ludziej karmić? Paviesili hnil, kab i miasa prahniło naskroź. Dyk vy addajcie biaspłatna ludziam», — skazaŭ jon.
«Tut taksama raspačać kryminalnuju spravu i raźbirajciesia pa ŭsich pytańniach», — skazaŭ kiraŭnik dziaržavy.
«Naturalna, tak być nie pavinna! Nieadkładna udakładnicie pa krainie, ci jość taki bardak na niejkich pradpryjemstvach», — daručyŭ Alaksandr Łukašenka hubiernataru Minskaj vobłaści.
«U nas niedazahružany mahutnaści narmalnych miasakambinataŭ. Nieadkładna vyklučyć adsiul miasa, pierakinuć na inšyja miasakambinaty, zabaranić prymać tut bydła, za miesiac navieści paradak! Nie naviadziecie — pojdziecie siudy pracavać», — adznačyŭ jon, źviartajučysia da Siamiona Šapiry.
«Usich vinavatych — u kamieru, niachaj kampiensujuć škodu. Usio pavinna być pierapracavana, usio, što sapsavana, chaj jaduć. Kali pakinuć ich tut, nikoha nie vypuskać — niachaj jaduć!» — dadaŭ Łukašenka.
«Ale nivodnaj tony žyvioły siudy bolš uvozić nielha. Addajcie hety bydła na pierapracoŭku ŭ inšyja vobłaści», - daručyŭ kiraŭnik dziaržavy.
Źviartajučysia da staršyni KDK, Alaksandr Łukašenka papiaredziŭ, što da 1 žniŭnia pavinien być naviedzieny paradak na ŭsich pradpryjemstvach.
«Uletku ja na takija pradpryjemstvy jeździć nie budu. Ale kali z 1 žniŭnia ja nie daj Boh zajdu i mnie niešta nie spadabajecca — viedaješ, što budzie», — skazaŭ jon.
Jon dadaŭ, što heta tyčycca i premjer-ministra ź jaho padnačalenymi, i kiraŭnikoŭ pradpryjemstvaŭ.
Alaksandr Łukašenka dadaŭ, što staršyniu Słuckaha rajvykankama «ratuje toje, što jon tut usiaho dva miesiacy pracuje».
«Imiem revalucyi naviadzicie paradak!» — padkreśliŭ jon.
