U Mahiloŭskim abłsudzie 15 krasavika na pasiadžeńni pa spravie byłoha staršyni Homielskaha harvykankama Viktara Pilipca padsudnyja vystupili z apošnim słovam. Nichto ź ich vinu nie pryznaŭ.
Nahadajem, 4 listapada 2013 hoda Mahiloŭski abłsud pačaŭ razhlad kryminalnaj spravy, raspačataj u dačynieńni da słužbovych asob Homielskaha harvykankama. Pavodle danych Śledčaha kamiteta, abvinavačvanyja ŭ vieraśni—kastryčniku 2011 hoda niezakonna raźmierkavali pamiž saboj, svajakami, blizkimi i znajomymi 24 kvatery ŭ damach, pryniatych u ekspłuatacyju ŭ studzieni—krasaviku 2011 hoda. Zatym hetyja kvatery byli pradadzienyja pa canie značna nižejšaj za rynačnuju. Častka žyłych pamiaškańniaŭ była aformlenaja na padstaŭnych asob.
Na łavie padsudnych akramia Pilipca — dyrektar upraŭleńnia kapitalnaha budaŭnictva Homiela Ihar Adarčanka, jaho namieśnik pa ekanomicy i finansach Valeryj Barysievič, načalnik žyllova-inviestycyjnaha adździeła Antanina Zielanok i načalnik płanava-dahavornaha adździeła Ała Nizkoŭskaja.
Pilipiec i Nizkoŭskaja ŭtrymoŭvajucca ŭ mahiloŭskim SIZA.
Vystupajučy z apošnim słovam, Viktar Pilipiec zajaviŭ, što pry rasśledavańni hetaj kryminalnaj spravy vykarystoŭvalisia «žachlivyja i časam zabaronienyja zakonam mietady».
Jon skazaŭ, što padčas rasśledavańnia navat u śviedak aryštoŭvałasia majomaść, što, na jaho dumku, źjaŭlajecca samaŭpraŭnaściu z boku asobnych členaŭ śledčaj hrupy.
«Vinavaciać u tym, što navat nie ŭkrali, a tolki kupili kvatery pa toj canie, pa jakoj tady hetyja kvatery pradavalisia», — adznačyŭ były staršynia Homielskaha harvykankama.
Pavodle jaho śćviardžeńnia, usie abvinavačańni na adras padsudnych zasnavanyja na zdahadkach i mierkavańniach i ničym nie paćviardžajucca. «Ja ŭ šoku ad taho, što adbyvajecca», — zajaviŭ padsudny.
Astatnija fihuranty spravy taksama nie pryznali svaju vinu, zajaŭlajučy, što ich abvinavačańni biespadstaŭnyja i ŭ ich dziejańniach nie było nijakich złačynnych namieraŭ, a dziejańni całkam adpaviadali zakanadaŭstvu.
Sudździa Siarhiej Konieŭ, zasłuchaŭšy apošniaje słova padsudnych, pryznačyŭ nastupnaje sudovaje pasiadžeńnie na 22 krasavika, zapłanavaŭšy na hety dzień vyniasieńnie prysudu.