Žurnalista haziety «Novy čas» Dźmitryja Hałko, jaki vandruje pa Uschodniaj Ukrainie, u zachoplenym sieparatystami Słaviansku zatrymali ŭzbrojenyja ludzi. Dźmitry Hałko paviedamiŭ «Našaj Nivie» akaličnaści spravy:
«Ja znachodžusia ŭ Słaviansku razam z dvuma žurnalistami-fryłansierami: francuzam i italjancam. Spačatku ŭsio było cicha: my navat zachodzili za barykady.
Adnak potym my vyrašyli patrapić u pasialeńnie cyhanoŭ, bo niapiaredadni pačuli pra cyhanskija pahromy.
Raptam da nas padyšli ŭzbrojenyja ludzi ŭ kamuflažy i bałakłavach i zatrymali nas. Uzbrojenyja jany byli vielmi dziŭna: u adnaho ź ich było štości nakštałt siaredniaviečnaha muškieta.
Hetyja ludzi stali vyśviatlać, chto my takija i što nam treba. Pa telefonie jany doŭha razmaŭlali z kimści z kamandavańnia. U vyniku nas traich zapichali na zadniaje siadzieńnie aŭtamabila i advieźli na «treci błokpost».
Tam nas sustreli ludzi nie z rahatkami i muškietami, a ŭ broniekamizelkach i z aŭtamatami Kałašnikava.
Na našyja pytańni jany skazali, što zbroju im vydali ŭ «časovaje karystańnie». Na błokpoście ŭ nas zabrali kamiery i taksama pačali vyśviatlać asoby. Adzin z «zialonych čałaviečkaŭ» dziela žartu nakiravaŭ na nas aŭtamat. Takija ŭ ich žarty.
Potym doŭha razmaŭlali pa telefonie i skazali, što nieŭzabavie pryjeduć ludzi, jakija «musiać vyrašyć naš los». Ludziej hetych my tak i nie sustreli, adnak nas adpuścili. My znoŭ pajšli na most. U jakaści «propusku» my zrabili fatazdymki siabie razam z uzbrojenymi mužčynami z «treciaha błokpasta», adnak fota nie dapamahło i nas znoŭ spynili, užo ŭ inšym miescy.
Nam skazali, što kali my chočam chadzić i zdymać, my pavinny źviarnucca pa akredytacyju ŭ zachopleny harsaviet. Adanak moj francuzski kaleha patłumačyŭ, što heta biezsensoŭna: za niekalki dzion da hetaha jon sprabavaŭ uziać hetuju akredytacyju, ale navat nie zdoleŭ patrapić u budynak haradskoj rady.
Uvohule, abstanoŭka ŭ Słaviansku napružanaja. Paŭsiul bronietechnika pad rasijskimi ściahami. Kamandzir hetaj kałony skazaŭ mnie: «Heta technika dla šturmu Kijeva».
Adnojčy mianie spyniŭ «zialony čałaviečak» i z honaram pakazvaŭ jašče saviecki pašpart, dzie ŭ hrafie «nacyjanalnaść» u jaho było paznana «ruski».
Tamu ja pakul vyrašyŭ viarnucca ŭ Danieck. Mabyć, viarnusia siudy paźniej».