Alaksandr Łukašenka pačaŭ svoj vystup na pavyšanych tanach, tolki pad kaniec krychu paspakajnieŭ. Bolšaja častka pramovy była pryśviečanaja patrebie madernizacyi ekanomiki, pry hetym prabivałasia tryvoha za stan ekanomiki.
Asablivych novych idej nie prahučała. Havorka išła pra realizacyi prajektaŭ zamieny abstalavańnia, asvajeńnia bolš efiektyŭnych technałohij, źnižeńnia zatrat enierhii.
U zamiežnapalityčnaj častcy Alaksandr Łukašenka sprabavaŭ zapeŭnić Jeŭrasajuz u hatoŭnaści «hulać pa praviłach» i być pryjaznym partnioram. Pry hetym prahučała niamała niesiabroŭskich słovaŭ na adras «Zachadu», «zamiežnikaŭ», «demakratyi». U pryvatnaści, Alaksandr Łukašenka padavaŭ spravu tak, niby Zachad patrabuje ŭviadzieńnia ŭ Biełarusi adnapołych šlubaŭ.
Rasija ž atrymała harbuz u pytańniach pryvatyzacyi. U pryvatnaści, było zajaŭlena, što Biełarusi niavyhadna abjadnańnie MAZa i KamAZa ŭ adzin chołdynh. Zajšła havorka i pra zaciažki z madernizacyjaj Biarozaŭskaj DRES.
Pierad siłavikami była pastaŭleny pryjarytet ekanamičnaj śfiery, nie palityčnaha vyšuku.
U cełym, kurs krainy i forma kiravańnia zastajucca niaźmiennymi.
Prapanujem Vam ahlad asnoŭnych punktaŭ zvarotu.
Adkryŭ pasiadžeńnie staršynia pałaty pradstaŭnikoŭ Uładzimir Andrejčanka.
Łukašenka zajšoŭ u zału ź nievialikim spaźnieńniem, jon u čyrvonym halštuku.
Pra kryzis
«Start piacihodki byŭ niaprostym. Nas taki začapiŭ suśvietny kryzis. Ale my jaho pieraadoleli. Siońnia my pieraadoleli miažu 500 dalaraŭ siaredniaha zarobku. Spravilisia ź inflacyjaj [u realnaści jana ŭ Biełarusi ŭsie apošnija hady stabilna samaja vysokaja ŭ Jeŭrazii, letaś była bolšaj 20% pa aficyjnych źviestkach - NN]. U nas samy vysoki pakaźnik indeksa čałaviečaha raźvićcia ŭ SND.
«Nahodaŭ dla tryvohi mienš nie stała». Łukašenka staŭ havaryć pra kryzis u jeŭrapiejskich krainach. «A jany ad nas patrabujuć reform», — kaža Łukašenka, i raz-poraz daje zrazumieć, što ŭsie rekamiendacyi suśvietnych i jeŭrapiejskich struktur, a navat i JeŭrAzES skiravany na toje, kab asłabić Biełaruś.
«My pavinny dakładna razumieć hłabalnyja pracesy i naša miesca ŭ ich». Šmat słovaŭ pra intelektualnyja vynachodnictvy čałaviectva.
«My siaredniaja jeŭrapiejskaja kraina, pazbaŭlenaja płanaŭ na suśvietnaje lidarstva. My možam albo prystasavacca da pieramien, albo zastacca na ŭzbočynie historyi».
Łukašenka kaža, što nam treba być «chutčejšymi» va ŭsich śfierach žyćcia. Pieramahaje toj, što pracuje na «apieradžeńnie». «Hety varjacki rytm nie adpaviadaje našamu mientalitetu, ale nam treba mianiacca. Inakš my prajhrajem va ŭsim».
«Druhoje patrabavańnie — hnutkaść. Treba padrychtavać tavar pad dziasiatki krain. Treba pierastrojvacca na chadu».
«Treciaje patrabavańnie — tvorčaść. Toj, chto kapijuje — budzie adstavać. Tolki tvorčaść moža zabiaśpiečyć praryŭ u lidary».
«Madernizacyja pavinna skončycca da Dnia revalucyi»
«Zachoŭvajecca stanoŭčaje salda, raście valutnaja vyručka». Łukašenka kaža, što ekanamičnaje raźvićcio jość, ale nie takoje, jak chaciełasia b.
«Kredytnyja resursy dla realnaha siektara ekanomiki stanoviacca bolš dastupnymi» [u realnaści staŭka refinansavańnia Nacbanka źnižana da 27%, ale jana zastajecca samaj vysokaj u Jeŭropie — NN].
«Rastuć zapasy aktyŭnaj pradukcyi. Na 1 krasavika skapiłasia pradukcyi na 30 tryljonaŭ rubloŭ. Bolš u dva razy, čym letaś». Pačałasia razmova pra prablemy.
«Kab vyjhravać u ciažkoj kankurentnaj baraćbie my zaŭsiody pavinny abnaŭlać svaje viedy, technałohii. Abnaŭleńnie — heta novy etap u našym raźvićci. My pavinny abapiercisia na try mocnyja nacyjanalnyja prajekty — madernizacyja, infarmatyzacyja, padtrymka moładzi».
«Niama čaho asprečvać — treba madernizacyja ci nie? Heta naturalny praces raźvićcia hramadstva».
«Siońnia Rasija ŭžo ŭstupiła ŭ SHA, a Kazachstan na parozie. Tamu faktyčna my ŭžo pracujem pa žorstkich praviłach».
«Adkrytych idej u piataj kałony, našych vorahaŭ niama. Tamu prapanujuć usio začynić. My takoje ŭžo prachodzili. Łamać — nie budavać, rozumu nie treba».
«My ŭstupajem u finalnuju stadyju madernizacyi. Nas žyćcio da hetaha padšturchnuła. U sielskaj haspadarcy madernizacyja ŭžo dźvie piacihodki idzie. My tudy ŭkłali 40 miljardaŭ dalaraŭ.
Na drevaaproŭcy madernizacyja pavinna skončycca da Dnia revalucyi [7 listapada — NN]».
«Siońnia našy rasijskija partniory ŭ čerhach stajać, kab trapić na našy naftapieraapracoŭčyja zavody».
Užo amal dvaccać chvilin Łukašenka tłumačyć i pierakonvaje, čamu krainie patrebnaja madernizacyja i što heta takoje. Abiacaje jakasny praryŭ u drevaapracoŭcy.
Łukašenka aburajecca harbarnaj vytvorčaściu, što ŭ kramach bolš zamiežnaha abutku, a nie biełaruskaha. I tut taksama budzie madernizacyja. Jašče ŭ lohkaj pramysłovaści.
Łukašenka kaža, što važna nie tolki pracavać na ŭnutrany rynak, ale i na ekspart.
«Siońnia naša kraina — heta adna vialikaja budoŭla». Kaža, što pa vynikach madernizacyi pavialičyŭsia vypusk cemientu z 3,5 miljonaŭ ton da 10 miljonaŭ.
Pra drevaapracoŭku
Pakul što Łukašenka vystupaje pa papiercy. Redka vychodzić za miežy napisana. Tolki, kali źviartaŭsia da kiraŭnika Minskaj vobłaści Barysa Batury, to adstupiŭ ad napisanaha.
«Ekspart kruhłaha lesu ŭpieršyniu ŭ historyi Biełarusi, kali nie całkam spynieny, to dniami budzie spynieny. Na novych vytvorčaściach budzie vypuskacca pradukcyja hłybokaj pierapracoŭki», — zajaviŭ A. Łukašenka.
«Darečy, toje, što nam arakuły ad piataj kałony [tak Łukašenka nazyvaje apazicyju i ŭsich praciŭnikaŭ režymu asabistaj ułady — NN] i z-za miažy pradrakali, što na drevaapracoŭčych zavodach uspychnuć masavyja biesparadki, teraryzm na hetych pradpryjemstvach paśla majho rašeńnia, hetaha nie adbyłosia», — pra zabaronu zvalniacca rabotnikaŭ z drevaapracoŭčych zavodaŭ.
Pra sielskuju haspadarku
«My navučylisia źbirać niakiepskija ŭradžai, daviali ekspart da amal 5 miljardaŭ. Ale nie možam vyjści na samafinansavańnie. Tracina ŭsich haspadarak stratnyja. Treba ŭ kožnym rajonie stvaryć vialiki ahrakambinat. Jość prykłady «Dziaržynski», «Ždanovičy», «Snoŭ».
Pry abjadnańni halečy bahatym nie stanieš. Tamu nie treba tut pierahibaŭ. Treba dumać, jak žabrak moža stać bahatym.
«Treba pradavać hatovuju pradukcyju — vendžanuju kaŭbasu, a nie tušy i paŭtušy».
Ab pryvatyzacyi
«Siońnia idzie bałbatnia pra pryvatyzacyju MAZa-KamAZa, prychodźcie ź Jeŭropy, Rasii. Ale kali da mianie prychodziać ludzi, to ja pytajusia, što my ad hetaha atrymajem?
Rynki ŭ nas jość. U nas jość prahrama madernizacyi MAZa. Ja pytajusia, kolki vy tudy ŭkładziecie. Hrošaj niama. Mianie infarmujuć, što za imi stajać zamiežniki z Hiermanii, ZŠA. Jany zacikaŭlenyja spynić vytvorčaść. Ja na takuju bandyckuju akcyju nie pajdu». Łukašenka vykazaŭsia suprać źlićcia MAZa i KamAZa.
«MVF, Zachad, Jeŭrasajuz, dy i Rasija dudziać u adnu dudu: davaj pryvatyzycyju! Ja nie suprać, ale davajcie narmalnuju canu. Nie treba nas nachilać, asabliva našym bratam.
My nie takija bahatyja, kab za biascenak pradavać našy pradpryjemstvy. Siońnia niavyhadna pradavać i ŭsie heta viedajuć», - kaža Łukašenka.
U toj ža čas jon nadzvyčaj chvalić supracu z šviejcarskaj kampanijaj «Štadler» — vypusk tramvajaŭ, tralejbusaŭ i elektryčak.
Pra enierhietyku
«Dobrym prykładam moža być «Mahiloŭchimvałakno». Krytyčnaja situacyja skłałasia ŭ Minenerha. Kožny čaćviorty dadzieny im rubiel nie daŭ efiekta. Razbazarvańnie hrošaj, dziasiatkaŭ, a moža i sotniaŭ miljonaŭ dalaraŭ. Śpiecyjalisty kazali, što nie treba nam prajekt pa Biarozaŭskaj DRES. «I tut u zale siadzić dypłamat, jaki łabiravaŭ hety prajekt». Zrabili, navošta? Publična chaču papiaredzić usich kiraŭnikoŭ inšych halin, kali takija parušeńni buduć vyjaŭlenyja, to litaści nie budzie».
Pra karupcyju
«Mužyki, piatla ž takaja, što hałavu ŭ jaje ŭsunieš, užo nie vyratujeciesia. Nie leźcie tudy. Vy ž usie vierniki. Pahladžu na vas u chramie, dyk tak moliciesia zaŭziata. Kali vy vierniki, to čaho kradziecie?
Kali nie chočacie, kab vas vykinuli z kresłaŭ i mianie z vami, to davajcie pracavać. U nas takoje ŭ historyi ŭžo było. Vy chočacie skončyć tym ža? Ja nie chaču. Jość u nas karupcyja. Jaje ciažka zžyć».
Pra infarmatyzacyju
Łukašenka stavić zadaču infarmatyzacyi ŭsich śfieraŭ hramadstva.
Pra moładź
Daručyŭ vyłučać moładź na vysokija pasady ŭ dziaržaparacie. (Pa ŭzroście biełaruski ŭrad samy stary ŭ rehijonie.)
Pra dachody nasielnicva i lhotnyja kredyty
«Pakul piedahohi nie pačnuć siabie aptymizavać, nijakaha pavyšeńnia zarpłaty nie budzie». Zarobak maje być zarobleny, kaža jon.
«Štoviečar, kładučysia spać, kožny hramadzianin pavinien padumać, što ja zrabiŭ za dzień, kab patrabavać u Łukašenki pavysić zarobki».
Pra žyllo
«Svaja kvatera, svoj dom pavinien być u kožnaj siamji. Ciapier žyllovaja palityka stanovicca bolš adrasnaj. Akazvać dapamohu budziem tolki tym, chto ŭ joj sapraŭdy maje patrebu. Źniali z čarhi 85 tysiač čałaviek.
Siońnia pabudavaŭ pa lhotnym kredycie – zaŭtra zdaje ŭ arendu. Nu i navošta my jamu budavali, kali nie treba?
Šarłatanaŭ na rynku budaŭnictva być nie pavinna. Budavać pavinny śpiecyjalisty. Vuń rasiejcy budujuć kala Lebiadzinaha [Minsk, prestyžny rajon kala Minsk-Areny]. Sardečna zaprašajem — budujcie.
Siońnia niakiepskija kvatery pradajuć pa 3,5 tysiačy za kvadratny mietr. Ja pytajusia, kolki kaštuje nasamreč? Mnie adkazvajuć, što dźvie tysiačy.
Žyllo pavinna być nie tolki dastupnym, ale i zručnym». Łukašenka kaža pra ŭščylnieńni. «Treba ŭščylniać tolki ŭ intaresach ludziej. Niaŭžo ziamli mała? Dosyć! Na ŭščylnieńni iści tolki ŭ krajnim vypadku».
Pra miedycynu
«Da 2015 hoda pałova lekaŭ pavinny stać biełaruskim. I nie dumajcie chitryć z upakoŭkami».
Łukašenka kaža, što maładyja śpiecyjalisty abaviazkova pavinny jechać pa raźmierkavańni, kudy pasyłajuć.
Pra škoły
«Prymušajcie škoły pracavać pa-sapraŭdnamu i nieści adkaznaści za dziaciej, spadar Maskievič». Pryčym — redki vypadak — nazvaŭ Mackieviča spadarom, «hospodinom».
Pra sport
«U hetaj śfiery nazapasiłasia šmat pytańniaŭ. Nam daviałosia pamianiać usio kiraŭnictva haliny. U asnovie pavinna być: «Luboje ŭznaharodžańnie tolki za vynik».
My pavinny padrychtavać usiu infastrukturu da Čempijanatu śvietu pa chakiei — 2014. My pavinny chutčej stvaryć spartovy ci spartova-kulturny telekanał.
Treniery pavinny pracavać chacia b jak nastaŭniki ŭ škole».
Pra madel dziaržaŭnaha kiravańnia
«Dziaržsłužačych u nas, nibyta, i niamnoha. U Aŭstryi, Bałharyi čynoŭnikaŭ u dva razy bolš. Ale my nie možam dapuścić vialikich strat na čynoŭnikaŭ. Skaračeńnie nie pavinny być biazdumnym, nielha ŭpuścić inicyjatyŭnych čynoŭnikaŭ. Pavinny syści tyja, chto vypadkova trapiŭ u dziaržaŭny aparat.
Usie sekanomlenyja na skaračeńniach hrošy pojduć na pavyšeńnie zarobkaŭ čynoŭnikaŭ».
Pra siłavikoŭ
«My ŭžo siońnia pavinny madernizavać siłavy błok. Surjoznaja madernizacyja idzie ŭ vojsku. Zaŭvažna pavialičyłasia padrychtoŭka kiraŭničych kadraŭ. My, kaniečnie, ni z kim vajavać nie budziem.
Poŭnaściu apraŭdała siabie ŭtvareńnie Śledčaha kamiteta».
Daje ŭkazańni pamiežnikam, kab žorstka raźbiralisia z tymi, chto nielehalna pierasiakaje miažu krainy. «Pamiežniki pry patrebie pavinny ŭžyvać zbroju. Miaža — nie dzirka». Faktyčna ŭzhadaŭšč vypadak sa šviedskim miedźviedziroŭščykam i z rasiejcam, što praskočyŭ miažu na mašynie pad Bieraściem.
Pra ES i ZŠA
«Viedučy z vami razmovy, my nie kirujemsia praviłam: «My z vami ci Rasijaj». My z Rasijaj — heta adzin narod. Nichto nie zdolny parušyć hety śviaty zakon.
Patrabavać ad nas paviarnucca adnoj častkaj da Rasii — heta kontrpraduktyŭna. Kali budziecie patrabavać, to nie siadajcie za adzin stoł z nami. My nie stvarajem prablem susiedziam. My nie chočam svarycca, my chočam być z vami ŭ narmalnych adnosinach.
Nie treba nas dušyć. Vy ž zrazumieli, što ŭsie sankcyi kontrpraduktyŭnyja. Nie patrabujcie ad nas, darahija, uvodzić adnapołyja šluby. Nie budzie ŭ nas hetaha, pakul ja prezident. My nie budziem nikoha dušyć, trucić. Chaj budzie apazicyja. Ale kali budzie bambić, to atrymaje pa mazhach. Nu nie saśpieli my da hałubizny, pačakajcie krychu».
Pra vizy
«Našy ludzi ŭsio čaściej vybirajuć dla adpačynku Abjadnanyja Arabskija Emiraty».
Łukašenka aburajecca, što ŭ nas zastajecca vizavy režym ź Izrailem, Sinhapuram.
«Nie treba dumać, što Afryka — heta adna haleča. Treba pracavać z hetym kantynientam».
Pytańni
Vystup doŭžyŭsia dźvie hadziny roŭnieńka.
Prapanuje zadavać pytańni: «Nie pieražyvajcie, što tut pradstaŭniki dypkorpusa — heta narmalnyja ludzi. Jany dobra aryjentujucca ŭ biełaruskaj situacyi. Nie chavajcie ničoha, nie bojciesia, što niekaha pakryŭdzicie».
Pra darohi
Deputat Siarhiej Bochan ź Viciebska zaniepakojeny stanam biełaruskich daroh. Kaža, što niedastatkova finansujecca ramont daroh.
«Heta ciažkaja i aktualnaja tema. U bližejšy čas, jak ź Minenerha, ja budu raźbiracca z darožnaj haspadarkaj. Hrošaj zaŭsiody nie chapaje, ale ci racyjanalna vykarystoŭvajucca tyja, što jość. Razhildziajstva — voś čamu ŭ nas darohi niedastatkova dobryja. Darohi i masty — heta kvietki ziamli».
Pra dobraŭparadkavańnie
Deputat Alaksandr Jaraševič sa Stolina havoryć pra budaŭnictva žylla. Słova «kvartał» vymaŭlaje z naciskam na pieršy skład. Prosić vyłučyć hrošy na dobraŭparadkvańnie dvaroŭ.
«Pałova my, pałova — vy, hatovyja?» Deputat kaža, što tak.
Pra miascovaje samakiravańnie
Deputat Ivančanka sa Staŭbcoŭ cikavicca pra admienu vybaru staršyń sielsavietaŭ, bo zhubiać viaskovy aktyŭ.
«My ja razumieju vašu zaniepakojenaść. Inicyjataram byŭ Batura. Ludzi ŭ vioskach hanarycca, kali jany deputaty. My rašeńnie prymiem razam z vami. Nu budziem nazyvać my ludziej administracyjaj, ci radaj, a nie deputatami».
Pra «Jamał—Jeŭropu — 2»
Pradstaŭnik savieta respubliki Kastahoraŭ havoryć pra hazapravod «Jamał – Jeŭropa-2».
«My tolki za. U nas dla hetaha ŭsio jość. U Polščy ŭsie kažuć roznaje. Kali Rasija vyrašyć budavać, to my padtrymajem. Kali damoviacca z palakami, to zaŭtra pačniom budavać».
Pra katastrofy i terakty
«Nam treba vypracoŭvać razam supraćstajańnie roznym źjavam, nie tolki teraktam, ale navat metearytam. Nivodnaja kraina, navat ZŠA, samastojna zrabić heta nie zmoža. Teraryzm – heta pavucina».
Pra hrašovyja ŭkłady
Deputatka Dabrynina z Oršy kaža, što siońnia ŭ śviecie mała miescaŭ, dzie možna svabodna zachoŭvać hrošy. Jana prapanuje zrabić Biełaruś najbujniejšym afšoram.
Łukašenka pahadziŭsia z takoj prapanovaj. Padčas adkazaŭ Łukašenka łahadniejšy, čym u vystupie.
Rubinaŭ kaža, što treba skančvać. Zvarot doŭžyŭsia niadoŭha. Usiaho dźvie z pałovaj hadziny.
