26 krasavika ŭ Minsku prajšła tradycyjnaja akcyja demakratyčnaj hramadskaści «Čarnobylski šlach - 2014», prymierkavanaja da 28-ch uhodkaŭ katastrofy na Čarnobylskaj AES, a taksama suprać budaŭnictva AES pad Astraŭcom.
Pavodle padlikaŭ žurnalistaŭ «Našaj Nivy» ŭ akcyi i šeści, jakoje prajšło ad kinateatra «Kastryčnik» pa vulicy Surhanava da parku Družby narodaŭ, uziali ŭdzieł kala 700 čałaviek.
Na płoščy Banhałor bolšaść udzielnikaŭ admoviłasia zachodzić za mietaličnyja turnikiety i mitynh słuchali niekalki dziasiatkaŭ čałaviek.
Padčas akcyi byli zatrymanyja hramadski aktyvist z Homiela Juryj Rubcoŭ, jaki pryjšoŭ na akcyju ŭ majcy «Łukašenka sychodź», hramadski dziejač Leanid Smoŭž, a taksama čałaviek pa imieni Mikałaj. Za imi ŭ tralejbus sieli asoby ŭ cyvilnym, a pierad tralejbusam padahnali sini mikraaŭtobus, kudy pasadzili zatrymanych.
18:27
Mitynh skončany.
18:25
Lidar Partyi BNF Alaksiej Janukievič adznačyŭ, što «Čarnobylski šlach» — heta «hołas volnaj Biełarusi ŭ abaronu biełaruskaj nacyi». Čarnobyl, pavodle jaho słoŭ, i pa hety dzień praciahvaje zabivać biełarusaŭ: «Siońnia nam prychodzicca jeści pradukty z zaražanych ziamiel, my nie atrymlivajem naležnaj dapamohi, infarmacyja zamoŭčvajecca».
Pavodle BiełaPAN, lidar Partyi BNF zapatrabavaŭ ad biełaruskich uładaŭ «pačać realnyja dziejańni, kab vyratavać biełarusaŭ». Jon zajaviŭ ab jadziernaj niebiaśpiecy z boku Rasii: pa-pieršaje, budaŭnictva ŭ Biełarusi AES; pa-druhoje, vierahodnaść raźmiaščeńnia jadziernaj taktyčnaj zbroi na samalotach, patencyjnaja ataka rasijskich vojskaŭ na jadziernyja abjekty na terytoryi Ukrainy ŭ vypadku vajny, pieraličyŭ palityk.
Udzielniki mitynhu prahałasavali za rezalucyju pad nazvaj «Nie atamnaj pahrozie! Nie damo svoj kraj, krainu, płanietu zrabić novym Čarnobylem!».
Rezalucyja źmiaščaje nastupnyja patrabavańni:
— Nieadkładna spynić budaŭnictva Astravieckaj AES, a taksama raspracavać i abmierkavać z hramadskaściu stratehiju ŭstojlivaha biaźjadziernaha raźvićcia Biełarusi;
— raskryć infarmacyju ab nastupstvach Čarnobyla ŭ Biełarusi, spynić haspadarčaje asvajeńnie i zasialeńnie zabrudžanych terytoryj, adnavić dziejańnie zakona «Ab sacyjalnaj abaronie hramadzian Respubliki Biełaruś, jakija paciarpieli ad avaryi na Čarnobylskaj AES», pryniataha ŭ 1991 hodzie;
— vyvieści z terytoryi Biełarusi rasijskija samaloty, zdolnyja nieści na borcie taktyčnaje jadziernaje ŭzbrajeńnie, a taksama vykonvać niejtralny biaźjadzierny status, jak zahadvaje Kanstytucyja Biełarusi;
- Dać mahčymaść hramadzianam samim vyrašać, jakimi buduć ich navakolnaje asiarodździe, horad i kraina. Pravieści demakratyčnyja reformy, zabiaśpiečyŭšy svabodu słova, schodaŭ, stvareńnia hramadskich arhanizacyj i palityčnych partyj, praviadzieńnie svabodnych i prazrystych vybaraŭ. Vyzvalić usich palitviaźniaŭ.
«My za biaźjadzierny śviet! My za ustojlivuju i biaśpiečnuju enierhietyku! My za enierhietyčnuju niezaležnaść Biełarusi! Nie AES! Nie vajnie!», — padkreślivajecca ŭ rezalucyi, pryniataj udzielnikami «Čarnobylskaha šlachu».
18:12
Ciapier vystupaje staršynia Partyi BNF Alaksiej Janukievič.
18:01
Mitynh pačaŭsia. Jaho słuchajuć kala 50 čałaviek.
Pieršym vystupaje prafiesar Lepin.
18:00
Tym časam pravaabaronca Nasta Łojka paviedmiła, što hramadski aktyvist z Homiela Juryj Rubcoŭ, Leanid Smoŭž sa Stabŭcoŭ i jašče adzin čałaviek (imia vyśviatlajecca) byli zatrymanyja ŭ tralejbusie.
17:56
Mitynh pakul tak i nie pačaŭsia. Kažuć, što zatrymaili hukaŭzmacnialnuju aparaturu.
Kala sceny staić niekalki dziasiatkaŭ čałaviek.
17:47
Pa infarmacyi «Našaj Nivy», homielskaha aktyvista Juryja Rubcova, jaki pryjšoŭ na akcyju ŭ majcy «Łukašenka sychodź», i jašče niekalkich čałaviek, supracoŭniki ŭ cyvilnym daviali da tralejbusa i sieli ŭ jaho razam ź im.
Pierad tralejbusam jedzie sini miniven. Jość vierahodnaść, što hetyja ŭdzielniki akcyi buduć zatrymanyja.
17:42
Za ramki prachodziać ličanyja dziasiatki čałaviek, bolšaść staić vakoł. Nina Bahinskaja kaža: «Nie pojdziem u reziervacyju» (za mietaličnyja ramki).
17:31
Demanstranty dajšli da parku Družby narodaŭ, dzie maje adbycca mitynh.
Stajać pierad mietaličnymi ramkami. Milicyja pavoli ŭsich prapuskaje, pilna razhladajučy płakaty.
Vidavočna, što nie ŭsie pojduć na płošču Banhałor.
16:56
Šeście pierajšło vulicu Ja. Kołasa i nabližajecca Surhanava da vuł. Bahdanoviča.
16:52
Hramadski aktyvist z Homiela Juryj Rubcoŭ, jaki na Dziadach u listapadzie byŭ ŭ majcy «Łukašenka sychodź» (za što byŭ aryštavany), pryjšoŭ u novaj majcy.
Śpieradu napisana «Łukašenka sychodź», a zzadu «Aryštujcie mianie. Padstava? Ja suprać Łukašenki»
16:51
Hałava kałony šeścia, u jakim biare kala 700 čałaviek, dajšła da vulicy Ja. Kołasa, šeście značna raściahnułasia. Prachožyja fatahrafujuć na mabilniki. Niekatoryja aŭtamabilisty pasihnalili.
16:33
Šeście pačałosia. U im biare ŭdzieł kala 700 čałaviek. Ludzi iduć pa tratuary vulicaj Surhanava.
Pieryjadyčna bjuć u zvon i skandujuć «Žyvie Biełaruś!», «Nie — AES». Pieryjadyčna — «Słava Ukrainie — Hierojam Słava».
16:27
Uklučyli aŭdyjozapis 1986 h. paviedamleńnia pra katastrofu na ČAES.
Pryjšoŭ eks-kandydat u prezidenty, piśmieńnik Uładzimir Niaklajeŭ.
Ludzi čakajuć pačatku šeścia.
na fota — ekołah Taćciana Novikava
16:25
Žančyny śpiavajuć himn «Mahutny Boža».
Usie rychtujucca da šeścia. Prynieśli čarnobylski zvon, u jaho pieryjadyčna bjuć, napieradzie trymajuć ikonu Čarnobylskaj Božaj Maci aŭtarstva Alesia Maračkina.
16:22
Lidar Partyi BNF Alaksiej Janukievič skazaŭ, što siońnia (darečy 25-y ČŠ), buduć stavicca prablemy nie tolki nastupstvaŭ Čarnobylskaj AES, ale i siońniašnija pahrozy atamnaha budaŭnictva, u pryvatnaści, budaŭnictva Astravieckaj AES, u tym liku.
Ludzi, darečy, trymajuć płakat «Niet — samostroju Astravieckaj AES)
16:11
Zaraz sabrałasia kala 300 čałaviek. Kožny ŭdzielnik akcyi trymaje pa šaryku.
Dva čałavieki stajać z płakatami «Svabodu (anarchistu) Jaŭhienu Vaśkoviču».
Źjaviŭsia lidar AHP Anatol Labiedźka.
Šmat ludziej trymaje ściahi na plačach, a nie na vudziliščach. Jość adzin ukrainski ściah.
Adzin čałaviek trymaje płakat «Jeŭrazijski sajuz — novy Čarnobyl»
16:00
Ludzi trymajuć raściažki «Niet druhomu Čiernobylu», «Za niezaležnuju Biełaruś»
Pakul vyhladaje ŭsio vielmi pryhoža, partyja BNF razdaje kožnamu pa žoŭtamu šaryku, što simvalizuje radyjacyju.
Kala kinateatra «Kastryčnik» sabrałasia kala 200 čałaviek. Da pačatku šeścia zastałosia paŭhadziny.
15:54
Pryjšli pradstaŭniki Partyi BNF razdajuć žoŭtyja šaryki ź simvolikaj radyjacyi. Pryjšli Alaksiej Janukievič, Juraś Hubarevič, Źmicier Sałoškin.
Taksama prynieśli ikonu «Čarnobylskaja Božaja Maci». Ludziej pakrysie prybyvaje.
15:50
Kala kinateatra «Kastryčnik» — 50-80 čałaviek, źjavilisia try pieršyja ściahi: dva bieł-čyrvona-biełyja, adzin ściah BCHD.
Prysutničajuć lidary BCHD Pavieł Sieviaryniec, Vital Rymašeŭski, hramadski dziejač Vacłaŭ Areška.
***
Siońnia — 28-ja hadavina katastrofy na Čarnobylskaj AES (26 krasavika 1986).
Demakratyčnaja hramadskaść Biełarusi adznačaje sumnyja ŭhodki siońnia tradycyjnym «Čarnobylskim šlacham».
Zbor udzielnikaŭ «Čarnobylskaha šlachu» abvieščany na 16.00 kala kinateatra «Kastryčnik» (st. mietro «Akademija navuk». Šeście pačniecca ŭ 16.30, a mitynh u parku Družby Narodaŭ projdzie z 17.30 da 18.30.
Arhanizatary sprabavali źmianić maršrut akcyi, prajšoŭšy ad kinateatra «Kastryčnik» vulicami Jakuba Kołasa i Łahojskim traktam u Kurapaty, ale Minharvykankam nie dazvoliŭ, adpraviŭšy zvykłym maršrutam.
«Naša Niva» budzie vieści anłajn ź miesca padziej.
Napiaredadni akcyi byli zatrymanyja niekalki hramadskich aktyvistaŭ, u tym liku Źmicier Daškievič, Maksim Viniarski, Illa Dabratvor, Alaksandr Franckievič.
