V.a. prezidenta Ukrainy, staršynia Viarchoŭnaj rady Alaksandr Turčynaŭ padpisaŭ zakon «Ab zabieśpiačeńni pravoŭ i svabod hramadzian i pravavym režymie na časova akupavanaj terytoryi Ukrainy».
Dakumient vyznačaje status akupavanych terytoryj, ustanaŭlivaje na ich admysłovy pravavy režym, a taksama vyznačaje asablivaści dziejnaści dziaržorhanaŭ, pradpryjemstvaŭ, ustanoŭ i arhanizacyj.
Pavodle zakona, časova akupavanaj terytoryjaj vyznačajucca terytoryi Aŭtanomnaj Respubliki Krym i Sievastopala, pavietranaja prastora nad imi, a taksama ŭnutranyja vody i terytaryjalnaje mora Ukrainy, uklučajučy padvodnuju prastoru, ich dno i nietry.
Pavodle zakona, časova akupavanaja terytoryja abjaŭlajecca zonaj z abmiežavanym dostupam ujezdu i vyjezdu. «Dla hramadzian Ukrainy, zamiežnych hramadzian i asob biez hramadzianstva ŭjezd na časova akupavanuju terytoryju i vyjezd ź jaje dapuskajecca tolki pa śpiecyjalnym dazvole i praz punkty ŭjezdu-vyjezdu ŭ paradku, ustanoŭlenym Kabinietam Ministraŭ Ukrainy», — havorycca ŭ dakumiencie.
Zakon praduhledžvaje, što časova akupavanaja terytoryja źjaŭlajecca nieadjemnaj častkaj terytoryi Ukrainy i na jaje raspaŭsiudžvajecca ŭkrainskaje zakanadaŭstva, adnak adkaznaść za parušeńnie pravoŭ čałavieka na joj uskładvajecca na RF. Pakryćcio materyjalnaha i maralnaha ŭronu, naniesienaha hetaj terytoryi, a taksama adkaznaść za achovu kulturnaj spadčyny na joj całkam uskładajecca na Rasiju.
Pavodle zakona, za fizičnymi i jurydyčnymi asobami zachoŭvajecca prava ŭłasnaści na majomaść, kali jana nabyta ŭ adpaviednaści z zakonami Ukrainy.
Na časova akupavanaj terytoryi zabaraniajecca lubaja haspadarčaja dziejnaść, jakaja padlahaje dziaržrehulavańniu (licenzavańnie, atrymańnie dazvolnych dakumientaŭ, siertyfikacyja i inšaja), uvoz i/ci vyvaz tavaraŭ vajennaha pryznačeńnia, arhanizacyja čyhunačnych, aŭtamabilnych, marskich, račnych, paromnych, pavietranych znosin. Taksama zabaroniena karystańnie dziaržaŭnymi resursami, u tym liku pryrodnymi, finansavymi i kredytnymi, zabaroniena ažyćciaŭleńnie hrašovych pieravodaŭ, a taksama finansavańnie ci inšaje sadziejničańnie vyšejpieraličanaj dziejnaści. Haspadarčaja dziejnaść, jakaja padlahaje dziaržrehulavańniu, dapuskajecca ŭ vypadkach, kali jana adkazvaje dziaržaŭnym intaresam Ukrainy, mirnamu ŭrehulavańniu kanfliktu, deakupacyi ci humanitarnym metam.
U kančatkovaj redakcyi zakona niama artykuła ab kałabaracyjnaj dziejnaści, jakaja była ŭ pieršym čytańni.
Zakon vyznačaje, što padčas praviadzieńnia vybaraŭ prezidenta Ukrainy, narodnych deputataŭ Ukrainy, usieŭkrainskaha refierendumu hałasavańnie hramadzian na časova akupavanaj terytoryi nie arhanizoŭvajecca i nie pravodzicca.
Ukraina abaviazvajecca prymać usie mahčymyja miery, praduhledžanyja Kanstytucyjaj Ukrainy i zakanadaŭstvam Ukrainy, normami mižnarodnaha prava, dla najchutčejšaha vyzvaleńnia terytoryi Ukrainy ad akupacyi, adnaŭleńnia cełasnaści i suvierennaści dziaržavy, adnaŭleńnia parušanych u vyniku akupacyi pravoŭ i svabod čałavieka i hramadzianina na ŭsioj terytoryi Ukrainy.
