Ministr unutranych spraŭ Ukrainy Arsien Avakaŭ prakamientavaŭ padziei ranicy i dnia va Ukrainie, u tym liku i zajavu rasijskaha MZS nakont situacyi na paŭdniovym uschodzie krainy.
«U palavych umovach ź internetam składana. Zaraz dabraŭsia da wifi (h.zn. paśla 18:00 — NN) — prahledzieŭ stužku navin. Šmat niedakładnaściaŭ i pamyłak pa antyterarystyčnaj apieracyi. Heta zrazumieła — my šmat infarmacyi zakryvali ad ŚMI naŭmysna. Ale voś zajava ruskich — nie pamyłka —
chłuśnia, i takoj stupieni nachabstva, što Hiebiels adpačyvaje.. Zajava rasijskaha MZS realna ŭraziła mianie svaim cynizmam. Tolki što sutykaŭsia — bačyŭ usio toje, što adbyvajecca na svaje vočy, a tut takoje…
Karnaja apieracyja suprać ułasnaha naroda, kažacie? A moža — dypłamatyčny etykiet u bok — antyterarystyčnaja apieracyja suprać dyviersijnaj hrupy HRU Rasijskaj Fiederacyi budzie dakładniej?
Napeŭna, dakładniej. Inakš jak rastłumačyć ranišnija streły «mirnych» apałčencaŭ, a dakładniej śpiecnazaŭcaŭ HRU pa ŭkrainskich viertalotach, jakija raskidvali ŭlotki? Strełami z PZRK (pieranosny zienitna-rakietny kompleks) rasijskaj vytvorčaści. Strełami nie naŭhad, a dupletam — śpiecyjalnaj taktykaj — u intervale z 5-siekundnaj zatrymkaj — tak, što pieršaja rakieta ŭziała na siabie ciepłavuju pastku viertalota, a druhaja patrapiła ŭ cel. Tak zdoleje stralać tolki padrychtavany specnazaviec.
Jak rastłumačyć paničnyja ranišnija zvanki bajevikoŭ da rasijskich bosvŭ z prośbaj dasłać avijacyju (pierachopy majucca - sam čuŭ)? Jak možna tak biessaromna chłusić? Chłuślivyja demahohi!»
U zajavie rasijskaha MZS siońnia, u pryvatnaści, kazałasia:
«U Rasii aburanyja pačatkam u Słaviansku karnaj vajskovaj apieracyi z pryciahnieńniem terarystaŭ z «Pravaha siektara» i inšych ultranacyjanalistyčnych arhanizacyj. Padraździaleńni ŭkrainskaj armii vykarystoŭvajuć tanki, inšuju ciažkuju techniku, bajavyja viertaloty, jakija nanosiać pa pratestoŭcam rakietnyja ŭdary. Pastupaje infarmacyja ab zahinułych i paranienych.
Jak my ŭžo nieadnarazova papiaredžvali, vykarystańnie armii suprać ułasnaha naroda źjaŭlajecca złačynstvam i viadzie Ukrainu da katastrofy.
Kali ŭ kahości i byli sumnievy, to ciapier stała kančatkova vidavočna, što šmatlikija zajavy tak zvanaha ŭrada Ukrainy ab namiery pačać ahulnanacyjanalny dyjałoh pa pošuku šlachoŭ vychadu krainy z hłybokaha kryzisu jość nie što inšaje, jak kryvadušnaść…».
