Jak paviedamili UNIAN va Ŭpraŭleńni suviaziaŭ z hramadskaściu MUS Ukrainy, u miežach rasśledavańnia kryminalnaj vytvorčaści ab masavych biesparadkach 2 maja ŭ Adesie byli zatrymanyja 172 asoby.
Paśla praviadzieńnia adpaviednych śledčych dziejańniaŭ častku ź ich adpuścili pad asabistaje zabaviazańnie. 127 čałaviek zatrymanyja jak aktyŭnyja ŭdzielniki masavych biesparadkaŭ, i ź imi pravodzicca kompleks dasudovych śledčych mierapryjemstvaŭ.
Padčas śledčych dziejańniaŭ pravaachoŭniki kanfiskavali ŭ zatrymanych ahniastrelnuju, naraznuju, hładkastvolnuju i traŭmatyčnuju zbroju, značnuju kolkaść zapalnaj sumiesi.
U MUS adznačyli, što biesparadki ŭ horadzie staranna rychtavalisia. Bolšaść zatrymanych asobaŭ, jakija na dadzieny čas užo identyfikavanyja, źjaŭlajucca hramadzianami Rasijskaj Fiederacyi i žycharami Prydniastroŭja.
Nahadajem, što 2 maja ŭ Adesie adbylisia sutyknieńni pamiž sieparatystami, uzbrojenymi ahniastrelnaj zbrojaj, i praŭkrainskimi aktyvistami, siarod jakich było šmat ultras. Zahinuli niekalki aktyvistaŭ. U adpłatu aktyvisty na Kulikovym poli razhramili łahier sieparatystaŭ, jakija zabarykadavalisia ŭ Domie prafsajuzaŭ. U budynku pačaŭsia pažar, u vyniku jakoha taksama zahinuli ludzi.
Pavodle apošnich źviestak, u Adesie paśla učorašnich sutyknieńniaŭ u balnicy źviarnulisia 214 paciarpiełych, ź ich 27 — u vielmi ciažkim stanie. Zahinuli 46 čałaviek.
