Prezident Rasii Uładzimir Pucin padpisaŭ ukaz ab uznaharodžańni dziaržaŭnymi ordenami i miedalami niekalkich sotniaŭ supracoŭnikaŭ rasijskich ŚMI «za vysoki prafiesijanalizm i abjektyŭnaść u aśviatleńni padziej u Respublicy Krym». Pry hetym ukaz byŭ padpisany jašče 22 krasavika, ale jaho da hetaha času trymajuć u sakrecie, i na aficyjnym sajcie prezidenta nie raźmiaščali.
Čynoŭnik, jaki bačyŭ dakumient, raspavioŭ vydańniu «Viedomosti», što ŭ śpisie pieraličanyja bolš za 300 proźviščaŭ pryčym 90 ź ich — karespandenty. Kala sotni uznaharodžanych pradstaŭlajuć VHTRK, bolš za 60 - «Pieršy kanał», pa niekalki dziasiatkaŭ - telekanały NTV, Russia Today i chołdynh Life News. Supracoŭnikaŭ telekanała «Dožd́» i radyjostancyi «Echo Moskvy» ŭ śpisie niama.
Pry hetym krynica zaŭvažyła, što maštab uznaharodžańniaŭ biesprecedentny: naprykład, paśla padziej 2008 hoda ŭ Paŭdniovaj Asiecii tahačasny prezident Dźmitryj Miadźviedzieŭ uznaharodziŭ usiaho 11 žurnalistaŭ.
Adznačajecca, što najbolš vysoka acenieny zasłuhi hienieralnaha dyrektara telekanała NTV Uładzimira Kuliścikava.
Jamu ŭručać orden « Za zasłuhi pierad Ajčynaj» II stupieni. Taho ž ordena, ale IV stupieni ŭdastojeny kiraŭniki Raskamnahlada Alaksandr Žaraŭ i FHUP «Rasijskaja televizijnaja i radyjoviaščalnaja sietka» Andrej Ramančanka, pieršy namieśnik hiendyrektara VHTRK Anton Złatapolski, hałoŭny redaktar ahienctva «Rośsija siehodnia» Marharyta Simańjan i hałoŭny redaktar Komsomolskoj pravdy» Uładzimir Sunhorkin.
Miž tym televiadučaha Uładzimira Sałaŭjova ŭznaharodziać ordenam Alaksandra Nieŭskaha, a hiendyrektaru chołdynhu Life News Aramu Habrelanavu dastaniecca orden Pašany.
