U suviazi z namieram rasijskich zaŭziataraŭ «dałučycca da śviatočnych mierapryjemstvaŭ» 9 maja, partyja BNF nakiravała ŭ Minharvykankam adpaviednuju zajavu.
«Va ŭmovach biahučaha abvastreńnia napružanaści ŭ stasunkach pamiž Ukrainaj i Rasijaj z nahody ŭzbrojenaha kanflikta va Ŭschodniaj i Paŭdniovaj Ukrainie pavialičvajecca ryzyka ekstremisckich vystupaŭ z boku rasijskich balelščykaŭ, jakija mohuć destabilizavać abstanoŭku ŭ horadzie i pastavić pad pahrozu hramadskuju biaśpieku ŭ horadzie u časie praviadzieńnia čempijanatu śvietu pa chakiei», — havorycca ŭ dakumiencie.
«Asablivuju naściarožanaść vyklikajuć paviedamleńni niekatorych spartovych sajtaŭ pra toje, što zapłanavanaje na 9 maja šeście asobnyja z hrupovak rasijskich balelščykaŭ chočuć pravieści pad nazvaj «Ruski marš». Mienavita pad hetaj nazvaj u Maskvie i inšych haradach Rasii rehularna pravodziacca demanstracyi pravaradykalnych i neanacysckich arhanizacyjaŭ», — adznačajecca ŭ zajavie.
U suviazi z vyšejskazanym BNF zaklikaje:
- Orhanam unutranych spravaŭ Minharvykankama ŭzmacnić dziejnaść pa niedapuščeńni i prafiłaktycy prajavaŭ ekstremizmu i raspalvańnia nacyjanalnaj varožaści, prapahandy vyklučnaści pa prykmiecie nacyjanalnaj prynaležnaści z boku balelščykaŭ zbornaj Rasii ŭ časie praviadzieńnia Čempijanatu śvietu pa chakiei ŭ horadzie Minsku jak na spartovych arenach, tak i pa-za ich miežami.
- Minharvykankamu zabaranić praviadzieńnie niesankcyjanavanych šeściaŭ dy inšych masavych akcyjaŭ kłubu Russia Unites dy inšym niezarehistravanym hrupoŭkam balelščykaŭ zbornaj Rasii.
- Minharvykankamu nie dapuskać raspaŭsiudžańnia ŭ časie spabornictvaŭ pravakacyjnych i ekstremisckich zaklikaŭ, asabliva ŭ dzień 9 maja, u tym liku padčas masavych mierapryjemstvaŭ, što arhanizujucca pad ehidaj Minharvykankama ŭ miežach fan-zonaŭ, zony haścinnaści kala Pałacu Sportu i ŭ miežach kulturnaj prahramy čempijanatu 9-25 maja.