Vyniki Sacyjalnaha Maršu kamentuje ekanamist Alaksandar Čubryk: Mahčyma, jany źjaviacca praz 5 hadoŭ. Ale naŭrad ci našmat raniej.
«Kali pryhadvać Lenina, varta pryhadać sfarmulavanyja im try ŭmovy revalucyjnaj sytuacyi: «viarchi nia mohuć kiravać pa-staromu», «nizy nia mohuć žyć pa-staromu», i najaŭnaść palityčnaj siły, jakaja hatovaja ŭziać uładu. Na moj pohlad, u Biełarusi na dadzieny momant niama nivodnaha z hetych čyńnikaŭ revalucyjnaj sytuacyi, sfarmulavanych Leninym. Ułady jak mahli kiravać, tak i mohuć, navat krychu bolš žorstka. Ludzi narmalna davoli žyvuć. Z takim uzroŭniem dachodaŭ navat pry skasavańni ilhotaŭ nichto na vulicu nia pojdzie. Nu i apazycyja ŭziać uładu ŭ svaje ruki taksama nie hatovaja.
Mnie niadaŭna daviałosia razmaŭlać z dakładčykam pa Biełarusi Parlamenckaj asamblei Rady Eŭropy Andrea Ryhoni. Na jahonuju dumku, biełaruskaje hramadztva pajšło značna dalej za apazycyju. Tut heta navat nie vina apazycyi, tak sytuacyja skłałasia, jana składałasia doŭha, jany hadoŭ 10 išli da hetaj sytuacyi.
I druhoje, što jon kazaŭ – što apazycyja prykryvaje svaje słabaści najaŭnaściu ŭ krainie represiŭnaha režymu. Tak, takoje jość, ale biezvynikovaść dziejańniaŭ apazycyi tłumačycca nia tolki hetym. Kali ŭžo pradstaŭnik Rady Eŭropy ahučvaje takija mierkavańni, to, vidać, sapraŭdy niešta treba rabić. Mnie tut ciažka kazać, što mienavita. Ale jak ekanamist ja mahu skazać, što zaraz nia isnuje ekanamičnych pieradumovaŭ dla palityčnych i sacyjalnych źmienaŭ. Mahčyma, jany źjaviacca praz 5 hadoŭ. Ale naŭrad ci našmat raniej».
