U Mahilovie na šviejnaj fabrycy AAT «Mahateks» ustanoŭlena novaje abstalavańnie francuzskaj firmy Lectra SA dla padrychtoŭča-raskrojnaj vytvorčaści.
Jak paviedamiŭ dyrektar šviejnaj fabryki AAT «Mahateks» Alaksandr Šamraj, na praciahu apošnich troch hadoŭ techničnaje pieraŭzbrajeńnie pradpryjemstva dazvoliła pavialičyć pradukcyjnaść šviejnaha cecha ŭ siarednim na 20%. «Adnak paŭstała prablema dysbałansu pamiž pracaj padrychtoŭča-raskrojnaha cechu i šviejnych učastkaŭ. Paćviardžeńniem hetamu stała vykarystańnie zvyšvyznačanaha času dla vytvorčaści patrebnaha abjomu raskroju paŭfabrykataŭ. Hetu prablemu i vyrašyć novaje abstalavańnie, jakoje dazvolić skaracić čas raskroju na 50%, palepšyć jakaść pradukcyi i daść mahčymaść hnutka pieranaładzić vytvorčaść pad kožnuju indyvidualnuju zamovu», — skazaŭ jon.
Da niadaŭniaha času na «Mahateksie» prymianiaŭsia miechanizavany mietad raskroju, paviedamili na pradpryjemstvie. Jon praduhledžvaŭ raskroj tkaniny pry dapamozie elektryčnych režučych mašyn, jakija pieramiaščajucca ŭručnuju, što patrabavała vialikich fizičnych i časavych vydatkaŭ, najaŭnaści značnaj kolkaści piersanału z vysokim uzroŭniem kvalifikacyi. Aŭtamatyčny sposab adroźnivajecca tym, što raskroj pravodzicca pierasoŭnaj aŭtamatyčnaj režučaj hałoŭkaj, jakoj kiruje mikrapracesar ci kampjutar.
Zakuplenaje ŭ firmy Lectra SA aŭtamatyzavanaje naściłačnaje abstalavańnie maje kompleks pryład i prystasavańniaŭ, jakija dajuć vysokuju dakładnaść i jakaść naściłańnia, što zabiaśpiečvaje źnižeńnie vydatku materyjału i pavieličeńnie chutkaści vytvorčaści, śćviardžajuć na «Mahateksie». Pracaj usioj sistemy kiruje kampjutar, rola absłuhoŭvajučaha piersanału zvodzicca da zahruzki stojki rułona tkaniny.
Na pradpryjemstvie ŭpeŭnienyja, što techničnaje pieraŭzbrajeńnie padrychtoŭča-raskrojnaha cecha dazvolić ekanomić pracoŭnyja resursy, syravinu i materyjały, vyzvalić supracoŭnikaŭ ad ciažkaj i manatonnaj pracy, dazvolić pašyryć asartymient pradukcyi.
Ciapier «Mahateks», realizujučy stratehiju techničnaha pieraŭzbrajeńnia, viadzie pieramovy z kampanijaj Samsung ab vyrabie kampresara dla padačy ścisnutaha pavietra dla technałahičnaha abstalavańnia adździełačnaj fabryki.