Zvarot apublikavany na sajcie «Biełaruskaj rehijanalnaj arhanizacyi Ruskaha nacyjanalnaha adzinstva (RNIE)» 9 maja.
Jaho rytoryka vytrymanaja ŭ duchu siońniašniaj rasijskaj prapahandy. Źviaržeńnie Janukoviča — «uzbrojeny pieravarot, arhanizavany ZŠA», siońniašniaja ŭkrainskaja ŭłada — «chunta, jakaja składajecca z ahientaŭ CRU i banderaŭcaŭ». Dalej užo duch aficyjnaj biełaruskaj prapahandy: «Na Majdanie było vielmi šmat BNFaŭcaŭ. Ukrainu jany ŭsprymajuć jak płacdarm, pry dapamozie jakoha jany majuć namier pieranieści pažar «kalarovaj revalucyi» u Biełaruś. Hetaha nielha dapuścić, bo heta moža pryvieści nie tolki da vialikaha krovapralićcia, ale i da straty dziaržaŭnaha suvierenitetu…».
Z łohikaj jość prablemy: heta ž narodžanaja Majdanam novaja ŭkrainskaja ŭłada i sprabuje nie dapuścić razvału krainy i straty suvierenitetu. Ale ŭ prapahandzie łohika i praŭda nie abaviazkovaja.
«Našym pravasłaŭnym bratam na ŭschodzie i paŭdniovym uschodzie byłoj Ukrainy patrebna dapamoha, bo suprać ich vajujuć nie tolki reštki byłoj rehularnaj ukrainskaj armii, ale i zamiežnyja najmity, u tym liku BNFaŭcy», — śćviardžajecca ŭ zvarocie.
I pry kancy Biełaruskaja rehijanalnaja arhanizacyja Ruskaha nacyjanalnaha adzinstva (BRA RNIE) abjaŭlaje pra stvareńnie «dobraachvotnickaha atrada dla arhanizavanaj dapamohi pravasłaŭnym bratam». Zapisvajuć mužčynaŭ, jakija słužyli ŭ vojsku.
Heta pieršaja ad pačatku 2000-ch adkrytaja sproba RNIE stvaryć u Biełarusi niezakonnaje paramilitarnaje farmavańnie.
* * *
Jak adznačaŭ Ihar Lalkoŭ u svaim analizie prarasijskaj piataj kałony ŭ Biełarusi, prarasijskija nacysty ŭ Biełarusi isnujuć, ale dziejnaść svaju nie afišujuć i chavajuć u lehalnych zarehistravanych arhanizacyjach spartovaha ci kulturnickaha nakirunku.
Z času źniščeńnia na pačatku 2000-ch strukturaŭ RNIE ŭ Biełarusi sapraŭdnyja paramilitarnyja farmavańni ŭ hetych asiarodkach nie paŭstajuć. Zabojstvy tahačasnych lidaraŭ rasiejskich nacystaŭ u Biełarusi Hleba Samojłava i Maksima Brejnara, a taksama šerah kryminalnych spravaŭ stali jaskravym sihnałam: niahledziačy na ŭsiu rytoryku pra słavianskuju jednaść, polem dla dziejnaści vajenizavanych nacysckich arhanizacyjaŭ Biełaruś nie budzie.
XX
