Na stancyjach i ŭ adździaleńniach pieralivańnia kryvi Biełarusi šukajuć novych donaraŭ. Medyki pravodziać tłumačalnuju pracu siarod studentaŭ i ŭ pracoŭnych kalektyvach. Ahitacyja ŭzmacniajecca z nabližeńniem 16 śniežnia, kali pačynaje dziejničać «Zakon ab uparadkavańni lhot asobnym katehoryjam hramadzian». Siarod inšych katehoryjaŭ jon admianiaje lhoty i donaram.
Plan pryjomu — 17 litraŭ za dzień — na Darožnaj stancyi pieralivańnia kryvi siońnia vykonvajecca. Ci zachavajecca takoje stanovišča paśla admieny lhot, tut nia viedajuć. Hałoŭnaje spadziavańnie — na studentaŭ, kaža hałoŭny ŭrač stancyi Źbihnieŭ Pabiaržyn:
«Moža, kali abvieściać, što lhoty pierastali dziejničać, to niešta i źmienicca. Ale ŭ nas vielmi šmat studentaŭ, prymajem ich faktyčna biez abmiežavańniaŭ. Lhotami jany amal nie karystajucca, a dapłaty da stypendyi my im robim. Jany chadzili i buduć chadzić».
U Biełarusi 20 stancyjaŭ i 41 adździaleńnie pieralivańnia kryvi. Stabilny zapas u mnohich pačynaje źmianšacca. U Respublikanskim navukova‑praktyčnym centry hiematalohii, jaki kaardynuje pracu, nie chavajuć, što viadziecca aktyŭnaja padrychtoŭka zamieny kadraŭ zdatčykaŭ kryvi. Havoryć dyrektar centru Michaił Patapnioŭ:
«Kali častka donaraŭ akcentuje na hetym uvahu, to, napeŭna, budziem mianiać hetych donaraŭ. Najpierš — na moładź. I ŭ navučalnych ustanovach, i na pradpryjemstvach — budziem ahitavać tych, kamu heta nie asnoŭnaje».
Ŭsiaśvietnaja arhanizacyi zdaroŭja, Eŭraźviazu i Čyrvonaha Kryžu z maralnych mierkavańniaŭ admaŭlaje płatu za zdaču kryvi. Adnak z eŭrapiejskich krainaŭ tolki 5 majuć systemy vyklučna biaspłatnaha donarstva — heta Finlandyja, Serbija, Słavienija, Hišpanija i Vialikaja Brytanija. U Čechii, Hrecyi, Italii, Makedonii, Rumynii i Charvatyi donary ŭznaharodžvajucca dniami vyzvaleńnia ad pracy. U Niamieččynie dapuskajecca apłata zdačy kryvi.
