Apieratar kabielnaha telebačańnia «TV-Sat» spyniŭ viaščańnie kanałaŭ «Intier+» i «1+1 International».
Jak stała viadoma karespandentu charter97.org, kiraŭnictva prypyniła tranślacyju z abhruntavańniem «da atrymańnia dazvołu na raspaŭsiud dadzienych telekanałaŭ na terytoryi Respubliki Biełaruś». Pry hetym padstavaj dla spynieńnia viaščańnia ŭkrainskaha TB nibyta stała pastanova Savieta Ministraŭ RB №1139 ad 26.12.2013 hoda. Čamu ž tady ŭsie apošnija miesiacy «Intier+» i «1+1 International» možna było hladzieć u Breście (bolš za toje, z anałahavaha farmatu hetyja kanały byli pieraviedzienyja ŭ ličbavy), u «TV-Sat» rastłumačyć nie zmahli.
Miž tym žychary Bresta, jakija sačyli za padziejami ŭ susiedniaj krainie mienavita pa ŭkrainskich telekanałach, adnaznačna nazyvajuć heta adklučeńnie sprobaj abmiežavać dostup da abjektyŭnaj infarmacyi.
«Hladzieć rasiejskaje telebačańnie i toje, jak jano aśviatlaje situacyju va Ukrainie — prosta niemahčyma, — raspavioŭ piensijanier Piotr Mirankoŭ. — Tam ža idzie sucelnaja prapahanda: i čym dalej, tym bolš».
Piotr Mirankoŭ taksama paviedamiŭ, što litaralna tydzień tamu telefanavaŭ kabielnamu aperataru «TV-Sat» i tam jaho zapeŭnili, što praviedzienaja madernizacyja abstalavańnia, jakaja dazvalaje bolš jakasna pieradavać televizijny sihnał. «A jašče jany skazali, što nijakich pieramienaŭ u viaščańni nie budzie: usie kanały, jakija zaraz možna hladzieć, zastanucca i nadalej. I voś paśla hetaj razmovy 13 maja raptam «Intier» i «1+1» adklučyli. Jak heta razumieć?», — ździŭlajecca brescki piensijanier.
U televizijnaj sietcy «TV-Sat» zastalisia jašče dva ŭkrainskija kanały, ale adzin ź ich — čysta spartyŭny, druhi pryśviečany aŭtanavinam.
Raniej viaščańnie ŭkrainskich kanałaŭ u kabielnych sietkach pierarvałasia ŭ Homieli.
