U siale Andrejeŭka pad Słavianskam Danieckaj vobłaści zahinuli italjanski fotažurnalist Andzi Rakieli i jaho pierakładčyk Andrej Mironaŭ.
Pra heta zajavili pradstaŭniki samaabvieščanaj «Danieckaj narodnaj respubliki» na staroncy ŭ Tvitary.
Abodva jany stali achviarami minamiotnaha abstrełu.
Akramia taho, ranieńnie atrymaŭ francuzski fotažurnalist Viljam Rahłon z ahienctva Wostok Press, paviedamlaje RIA «Naviny» sa spasyłkaj na francuzskuju hazietu Le Monde.
Pa słovach Rahłona, u subotu ŭviečary žurnalisty, Mironaŭ i ich kiroŭca patrapili pad minamiotny abstreł.
Jany pakinuli mašynu i zalehli ŭ kiuviecie. Upała ad 40 da 60 snaradaŭ, raspavioŭ francuz.
Adna ź min razarvałasia prosta ŭ kiuviecie. Rahłon atrymaŭ askiepkavyja ranieńni noh. Jaho spadarožniki lažali biez ruchu.
«Rahłon pad ahniom pabieh da pazicyj sieparatystaŭ, pakazvajučy svaju aparaturu i kryčučy, što jon žurnalist. Jaho pasadzili ŭ mašynu i adpravili ŭ špital, dzie akazali miedycynskuju dapamohu», — pišuć «Hrani.ru».
Žyćcio Rahłona pa-za niebiaśpiekaj, pieradaje francuzskaja hazieta Parisien sa spasyłkaj na zajavu źniešniepalityčnaha viedamstva Piataj respubliki.
Andzi Rakieli było 30 hadoŭ, jon udzielnik hrupy fotareparcioraŭ Cesuralab. Pra jaho śmierć piša i italjanskaje ahienctva Ansa sa spasyłkaj na infarmavanyja krynicy.
Pasolstva Italii ŭ Kijevie sprabuje pravieryć infarmacyju ab tym, što adbyłosia ź italjanskim fotareparcioram i jaho rasijskim pierakładčykam pad Słavianskam, paviedamlaje italjanski MZS. Pradstaŭniki italjanskaha pasolstva taksama vyśviatlajuć los žurnalistaŭ, u tym liku z dapamohaj pradstaŭnikoŭ ABSIE.
Heta pieršy vypadak hibieli žurnalistaŭ u vajnie na Danbasie.
Andrej Mironaŭ, pa dadzienych «Hraniaŭ», — pravaabaronca, supracoŭnik «Miemaryjału», były saviecki palitviazień. Jon pracavaŭ u Čačni, rasśledavaŭ prymianieńnie roznych vidaŭ zbroi. Mironaŭ byŭ pastajannym udzielnikam pratestnych mitynhaŭ.