Administracyja prezidenta vydaliła z sajta aficyjnaha internet-pradstaŭnictva v.a. prezidenta rasparadžeńnie Turčynava ab ŭračystych mierapryjemstvach na Majdanie Niezaležnaści ŭ Kijevie z nahody ŭstupleńnia na pasadu novaabranaha prezidenta.
Zaraz dadzienaje rasparadžeńnie na sajcie adsutničaje, adznačajuć «Ukrainskija Naviny».
Pradstaŭnik pres-słužby Administracyi paviedamiŭ, što rasparadžeńnie źniata z sajta pa daručeńni kiraŭnictva AP, dadaŭšy, što pryčyna takoha rašeńnia jamu nie viadomaja.
Jak paviedamlałasia, rasparadžeńniem №931 ad 29 maja Turčynaŭ stvaryŭ rabočuju hrupu pa zabieśpiačeńni praviadzieńnia na Majdanie Niezaležnaści ŭ Kijevie ŭračystych mierapryjemstvaŭ z nahody ŭstupleńnia na pasadu novaabranaha prezidenta. Pracoŭnuju hrupu ŭznačaliŭ pieršy vice-premjer Vital Jarema.
Hrupie było daručana prapracavać pytańnie i raspracavać miery pa narmalizacyi situacyi na Majdanie i prylehłych da jaho vulicach u Kijevie i stvaryć umovy dla zabieśpiačeńnia naležnaha vykanańnia Kijevam funkcyj stalicy, praduhledzieŭšy, u pryvatnaści, praviadzieńnie na Majdanie mierapryjemstvaŭ pamiaci zahinułych udzielnikaŭ mirnych akcyj pratestu na praciahu listapada 2013 — lutaha 2014 hoda.
Turčynaŭ taksama stvaryŭ arhkamitet z nahody inaŭhuracyi prezidenta. Štab kandydata ŭ prezidenty Parašenki zajaviŭ, što pryniaćcie prysiahi novaabranym prezidentam adbudziecca 7 červienia i što jany nie płanujuć jakich-niebudź uračystych padziej na Majdanie z nahody inaŭhuracyi.
