1 červienia skončyłasia rehistracyja na centralizavanaje testavańnie. Kolkaść abituryjentaŭ značna pamienšyłasia ŭ paraŭnańni z papiarednim hodam. Kali ŭ 2013 na testy zarehistravałasia 117 tysiač čałaviek, to ŭ 2014 Respublikanski instytut kantrolu viedaŭ naličyŭ 105,6 tysiač abituryjentaŭ.
Niesuciašalnaj jość statystyka pa movie testaŭ, jakuju vybrali abituryjenty. Biełaruskaja mova, jak i raniej, značna sastupaje pa papularnaści rasijskaj i praciahvaje hublać prychilnikaŭ.
Tak, biełaruskuju movu dla abiaviazkovaha moŭnaha ispyta vybrali tolki 25% abituryjentaŭ: 26 tysiač suprać 78 tysiač čałaviek, jakija buduć zdavać rasijskuju movu. Heta na 3% mienš za 2013 hod. U 2012 hodzie biełaruskuju movu zdavali 45 tysiač čałaviek — 32% ad ahulnaj kolkaści zarehistravanych.
Kolkaść tych, chto choča zdavać profilnyja pradmiety pa-biełarusku, taksama padaje. U hetym hodzie biełaruskamoŭnyja błanki testaŭ pa historyi Biełarusi atrymajuć usiaho 14,25% abituryjentaŭ. U 2013 hodzie historyju Biełarusi pa-biełarusku zdavali 18,8%, a ŭ 2012 — 23,5% abituryjentaŭ. U 2011 hodzie hety pakazčyk byŭ roŭny 33%.
Druhoje miesca trymaje suśvietnaja historyja. Pa-biełarusku jaje źbirajucca zdavać 6,5% abituryjentaŭ.
Biełaruskamoŭnyja testy pa bijałohii zamovili 5,5% abituryjentaŭ, hieahrafii — 5, 18%, pa matematycy i chimii — 5%, pa fizicy — 4,8%.
Samaja «niebiełaruskamoŭnaja» dyscyplina CT — hramadaznaŭstva. Tolki 2% abituryjentaŭ buduć zdavać hety ispyt pa-biełarusku.
Kolkaść vučniaŭ biełaruskamoŭnych škoł u krainie ŭ 2013-2014 składała 15% ad ahulnaj kolkaści (142 tysiačy dziaciej, heta kožny siomy vučań).
