U Pienzienskaj vobłaści Rasii tryccać siektantaŭ, a siarod ich i biełarusy, syšli ŭ ziamlanku i zavalili ŭvachod. Jany prychapili z saboj hazavyja bałony i pahražajuć uzarvać siabie, kali ich buduć vyhaniać z‑pad ziamli.
Paviedamlajecca, što žychary vioski Pahanaŭka spadziajucca takim čynam vyratavacca ad Apakalipsisu, jaki, pavodle ich prahnozaŭ, adbudziecca ŭ traŭni 2008 hoda.
Ciapier ziamlanka ačeplenaja milicyjaj. Ułady bajacca, što šerahi siektantaŭ mohuć papoŭnicca i nikoha da ziamlanki nie dapuskajuć. Viadoma, što siarod ich jość dzieci, samamu maleńkamu 1,4 hoda.
Siektu ŭ Pahanaŭcy zasnavaŭ miascovy žychar Piotr Kuźniacoŭ. Jon adkryŭ malelny dom, prychadžanami jakoha źjaŭlajucca vierniki ź Biełarusi, Padmaskoŭja i Rastova. Hetyja ludzi paŭtara hoda tamu kupili ŭ vioscy damy, nidzie nie pracavali i svaich dziaciej nie puskali ŭ škołu.