Kampanija InterContinental Hotels Group, adna z najbujniejšych hłabalnych haściničnych kampanij, padpisała pahadnieńnie ab adkryćci pieršaha ŭ Biełarusi hatela sietki Holiday Inn — Holiday Inn Minsk, paviedamili ŭ pres-słužbie kampanii.
Budaŭnictva hatela zapłanavana ŭ 2015 hodzie, adkryjecca jon u 2016 hodzie. Zaraz viadziecca prajektavańnie budynka. Upraŭleńnie hatelem budzie ažyćciaŭlacca pavodle ŭmoŭ dahavora franšyzy z kampanijaj Hospitality Group LLC.
Hatel Holiday Inn Minsk budzie mieć adkrytaje łobi, jakoje źjaŭlajecca admietnaj rysaj brenda. Akramia łobi i zony rehistracyi, u adnu adkrytuju prastoru abjadnoŭvajucca taksama restaran, bar, łaŭnž-zona i biźnies-centr. «Heta nadaje haścinicy značna bolš sučasny vyhlad. Ideja adkrytaha łobi źjaviłasia ŭ vyniku daśledavańnia pavodzinaŭ ludziej u siabie doma. Jaje realizacyja dazvalaje pastajalcam maksimalna hnutka vykarystoŭvać intehravanuju prastoru hatela, kali razmova idzie pra charčavańnie, adpačynak, pracu abo zabavy», — adznačaje pres-słužba.
U hateli budzie 205 numaroŭ, dzieviać ź jakich apartamienty. Dla haściej budzie pracavać fitnies-zała, parkoŭka na 35 aŭtamabilaŭ, čatyry pieramoŭnyja pakoi, pakoi adpačynku, restaran i łaŭnž-zona.
Holiday Inn Minsk raźmieścicca ŭ rajonie stancyi mietro «Niamiha».
«Brend Holiday Inn zapisaŭ na svoj rachunak mnostva roznych pačynańniaŭ, jakija stali trendam dla raźvićcia haliny, — ad biaspłatnaha raźmiaščeńnia i davańnia charčavańnia dzieciam u miežach prahramy Kids Stay and Eat Free da hłabalnaha abnaŭleńnia hatelaŭ, u jakoje my inviestavali miljard dołaraŭ. I siońnia my z zadavalnieńniem abjaŭlajem ab płanach budaŭnictva pieršaha ŭ Biełarusi Holiday Inn. Heta samy paznavalny ŭ śviecie haściničny brend, adnolkava pryvabny jak dla ŭładalnikaŭ, tak i dla haściej, jakija šukajuć adnačasova jakasny i pry hetym nie vielmi darahi hatel mižnarodnaha brenda. My budziem rady supracoŭničać z Hospitality Group LLC u pracy nad hetym zachaplalnym prajektam», — skazaŭ vice-prezident pa raźvićci IHG u Rasii, krainach SND i Hruzii Aron Libinsan.
IHG abjadnoŭvaje dzieviać brendaŭ amal u 100 krainach. Usie hateli IHG źjaŭlajucca ŭdzielnikami prahramy łajalnaści IHG Rewards Club, pieršaj i najbujniejšaj u halinie z 79 miljonami členaŭ. Holiday Inn — suśvietny hatelny brend z najbolšaj kolkaściu hatelaŭ, jakija funkcyjanujuć, u hety momant viadziecca praca pa adkryćci jašče 262 hatelaŭ u roznych krainach. U Jeŭropie funkcyjanuje 278 hatelaŭ Noliday Inn. Zapłanavana budaŭnictva jašče 36.
