Daradca prezidenta Rasii Siarhiej Hłaźjeŭ prapanuje nanieści ŭdar pa ŭkrainskaj armii, kab nie dać joj adužać.
Pra heta Siarhiej Hłaźjeŭ zajaviŭ u chodzie kruhłaha stała ŭ Maskvie.
«Chaču nahadać słovy Čerčyla: «Toj, chto pamiž hańbaj i vajnoj vybiraje hańbu, atrymlivaje i vajnu, i hańbu adnačasova». Heta vajna sučasnaja. Heta nie značyć, što nam treba ruchać našy tanki na Kijeŭ, ale, pa mienšaj miery, spynić hienacyd nasielnictva my majem prava», — skazaŭ jon.
«Dla hetaha dastatkova zakryć nieba i vykarystoŭvać toj ža miechanizm padaŭleńnia vajennaj techniki, jaki ŭžyli tyja ž amierykancy ŭ Livii, jakija spačatku zakryli nieba, zatym z pavietra rasstralali braniatechniku, artyleryju, avijacyju i takim čynam zrabili toj režym, ź jakim jany vajavali, niebajazdolnym», — skazaŭ jon.
«U nas jašče jość mahčymaść heta zrabić, praz paŭhoda takoj mahčymaści ŭžo nie budzie», — skazaŭ Hłaźjeŭ.
Jon zajaŭlaje, što ŭłady Ukrainy ŭziali kurs na militaryzacyju i mabilizacyju nasielnictva suprać Rasii.
«Pahladzicie dynamiku — kali ŭ śniežni nacystaŭ było 2 tys. čałaviek u Kijevie, u lutym — 20 tys., u mai ich užo 50 tys. razam z vajskoŭcami, u siaredzinie leta ich budzie 100 tys., u vieraśni ich budzie 200 tys., da kanca hoda jany pastaviać pad ružžo 500 tys. čałaviek», — skazaŭ Hłaźjeŭ i dadaŭ, što va Ukrainie pravodzicca raskansiervacyja vajskovaj techniki.
«My atrymlivajem mahutnuju vajennuju mašynu, aryjentavanuju suprać nas, našpihavanuju nacystami, ideałahična zaradžanymi suprać Rasii… Kančatkovaj metaj hetaha ŭsiaho dziejańnia źjaŭlajecca vajna z Rasijaj. My nie zmožam, straciŭšy Danbas, zachavać mir, bo nastupnaja meta, jakaja dekłarujecca — Krym», — skazaŭ jon.
