Biełaruskija biznesmieny redka chvalacca svaimi prybytkami. Chto ź ich staŭ miljanieram, a chto padstupajecca da pieršaha miljarda, zastajecca tolki zdahadvacca.
Ofis kampanii Juniviest-M u Minsku, fota Siarhieja Hudzilina
Adzinaja mahčymaść zazirnuć u buchhałteryju ich kampanij — štokvartalnyja i hadavyja spravazdačy, jakija publikuje Ministerstva finansaŭ. Pavodle zakona, takija dakumienty abaviazanyja ahałošvać adkrytyja akcyjaniernyja tavarystvy, a taksama kampanii, jakija vystaŭlali na prodaž svaje ablihacyi.
Siarod pryvatnaha biznesu samaj prybytkovaj kampanijaj staŭ «Jeŭrahandal» (kramy «Jeŭraopt»).
Letaś jana pryniesła svaim haspadaram, Siarhieju Litvinu i Uładzimiru Vasilku, $52 miljony. Dla paraŭnańnia, pazaletaś miljaniery, jakija kirujuć biznesam ź Litvy, kudy daŭno vyjechali, zarabili $36 miljonaŭ.
A voś prybytkovaść pančochaŭ ad «Konte Spa» źmienšyłasia, pryčym bolš čym udvaja. Kampanija hrodzienskaha biznesmiena Valancina Bojki atrymała $22 miljony i istotna adstała ad «Jeŭraopta».
«Trajpł» — fłahman razhalinavanaj biznes-impieryi, jakoj vałodaje Juryj Čyž, miljanier z čornaha śpisa Jeŭrasajuza. Za minuły hod čysty prybytak kampanii, jakaja zajmajecca «vytvorčaściu praduktaŭ naftapierahonki», skłaŭ $11 miljonaŭ. Abaroty «Trajpła» istotna źnizilisia, adnak spravazdača demanstruje, što biznes usio jašče vyhadny.
Anatol Tarnaŭski — jašče adzin biznesmien, jaki trapiŭ pad jeŭrapiejskija sankcyi. Jahony «Juniviest-M», były naftatrejdar, ciapier zajmajecca aptovym handlem. Heta prynosić pa $4 miljony čystaha prybytku druhi hod zapar. Nahadajem, u kampanii na kirujučaj pasadzie pracavała Hanna Łukašenka, niaviestka kiraŭnika krainy i žonka jahonaha syna Dźmitryja.
Brescki biznesmien Alaksandr Mašenski śpiecyjalizujecca na dźviuch «charčovych» vytvorčaściach. Jahony rybny «Santa-Bremar» pa abarotach abahnaŭ navat Biełaruskuju čyhunku, ale čysty prybytak akazaŭsia davoli ścipłym, usiaho $860 tysiač. A voś na «Savuškavym pradukcie» ŭdałosia zarabić $15 miljonaŭ. Nivodnaha rubla ź ich nie było pieraličana na dyvidendy akcyjanieram.
Z kampanij viadomych biznesmienaŭ varta ŭzhadać vytvorčaść bializny «Sierž» Siarhieja Atroščankava (prybytak — $190 tysiač), budaŭničuju kampaniju «Mirny šlach» tenisista Maksima Mirnaha ($830 tysiač zamiest pazaletašnich $80 tysiač), a taksama pradpryjemstva «Spamaš». Heta adzin ź biznesaŭ blizkaha da Łukašenki miljaniera Alaksandra Šakucina. Letaś «Spamaš» prynios jamu čystych strataŭ na $770 tysiač.
Padobnyja straty — $690 tysiač — pakul što niasie i «Holf-kłub», hučny prajekt, partnioram jakoha źjaŭlajecca Prezidencki spartyŭny kłub Dźmitryja Łukašenki.
Cany na miasa kaśmičnyja, a miasakambinaty stratnyja
Niekalki hadoŭ tamu samymi stratnymi akcyjaniernymi tavarystvami krainy byli małočnyja zavody. Na ich prachodziła madernizacyja, jakaja psavała finansavyja spravazdačy. Ciapier u aŭtsajdarach apynulisia miasakambinaty z Barysava, Słucka, Žłobina, Oršy, Homiela, Babrujska, Kalinkavičaŭ, Hłybokaha, Słonima, Viciebska, Mioraŭ — ahulnyja straty bolš za $120 miljonaŭ.
Top-10 samych prybytkovych kampanij Biełarusi za 2013 hod
