Byłyja prezidenty Ukrainy Leanid Kraŭčuk, Leanid Kučma i Viktar Juščanka nakiravali prezidentu Rasii Uładzimiru Pucinu adkryty list z zaklikam spynić ahresiju suprać Ukrainy.
Unian.net
«My padpisali adkryty list prezidentu Rasii Uładzimiru Pucinu ab tym, što nieabchodna spynić ahresiju, i što Ukraina hatovaja da mirnych pieramovaŭ», — zajaviŭ žurnalistam Leanid Kraŭčuk paśla ŭskładańnia kvietak u parku Słavy, dzie palityki sabralisia z nahody Dnia smutku i ŭšanavańnia pamiaci achviar vajny va Ukrainie.
Pavodle jaho słoŭ, vielmi važna, što hety list padpisali mienavita 22 červienia, bo «ŭ hety dzień navat u takich dyktataraŭ, jakija na siońniašni dzień isnujuć u śviecie, serca pavinna adkrycca».
Taksama Kraŭčuk adznačyŭ, što historyja niekatorych ludziej ničomu nie navučyła, tamu prosić Pucina nie ŭmiešvacca ŭ spravy Ukrainy i spynicca.
Eks-prezident vykazaŭ upeŭnienaść u tym, što kali ciapier Pucin spynić ahresiju suprać Ukrainy, to ŭ jaho jašče jość šaniec zastacca ŭ historyi jak «śvietłaja asoba».
Pry hetym Kučma pryznaŭ, što biez namahańniaŭ Pucina kanflikt va ŭschodniaj Ukrainie pahasić nie atrymajecca.
Taksama, na jaho dumku, ciapierašnija padziei pakazali canu zajavam ab «braterskich adnosinach» pamiž Ukrainaj i Rasijaj.
Prezident Juščanka ličyć, što Rasija ŭžo viadzie nieabvieščanuju vajnu suprać Ukrainy.
Eks-prezidenty adznačyli, što list Pucinu napisany ŭ karektnaj formie i na ruskaj movie.
U liście eks-prezidenty Ukrainy spasyłajucca na mirny płan Piatra Parašenki, jaki napiaredadni, znachodziačysia ŭ štabie antyterarystyčnaj apieracyi pad Słavianskam, addaŭ zahad Uzbrojenym Siłam, Nacyjanalnaj hvardyi, padraździaleńniam MUS, pamiežnikam u adnabakovym paradku spynić ahoń da 27 červienia.
