Dziejučy rasijski zakon «Ab palicyi» moža być źmienieny. Dziesiać deputataŭ Dziaržaŭnaj dumy padrychtavali 60 papravak da zakona, jakija pašyrajuć paŭnamoctvy palicyjantaŭ. Dakumient u bližejšy čas budzie ŭniesieny ŭ Dziarždumu.
Aŭtary zakonaprajekta ličać, što papraŭki zapoŭniać prabieł u dziejučym zakanadaŭstvie, adnak ekśpierty i pravaabaroncy aścierahajucca, što papraŭki mohuć spravakavać palicejskaje samavolstva, tak jak stanie składaniej vyznačyć, pieravysiŭ ci supracoŭnik pravaachoŭnych orhanaŭ svaje paŭnamoctvy.
Tak, papraŭka da č. 5 art. 23 zakona prapanuje źniać zabaronu na ŭžyvańnie ahniastrelnaj zbroi da žančyn. Pakul zakon zabaraniaje stralać na paražeńnie ŭ žančyn.
Deputaty prapanujuć zabaranić stralać tolki ŭ žančyn ź vidavočnymi prykmietami ciažarnaści, a ŭ astatnich, na ich dumku, stralać na paražeńnie možna.
«Uličvajučy toj fakt, što žančynami taksama ździajśniajucca złačynstvy roznaj stupieni ciažkaści, u tym liku terarystyčnyja akty, prajektam prapanujecca zabaranić užyvać ahniastrelnuju zbroju tolki ŭ adnosinach da žančyn ź vidavočnymi prykmietami ciažarnaści», — paznačana ŭ tłumačalnaj zapiscy da prajektu fiederalnaha zakona.
Dziejučy zakon zabaraniaje supracoŭniku palicyi prymianiać ahniastrelnuju zbroju pry vialikaj kolkaści ludziej, kali ŭ vyniku mohuć paciarpieć vypadkovyja asoby.
Aŭtary papravak prapanujuć zrabić vyklučeńni, kab palicyjant moh stralać u natoŭpie pry krajniaj nieabchodnaści — «va ŭmovach abhruntavanaj ryzyki albo ŭ inšych vypadkach, praduhledžanych zakanadaŭstvam Rasijskaj Fiederacyi».
Adnak, jak vyznačyć abhruntavanaść ryzyki, aŭtary papravak vyrašyli nie tłumačyć.
U prajekcie niama rasšyfroŭki mnohich novych aznačeńniaŭ, jakimi prapanujecca zamianić dziejučyja. Naprykład, raniejšy zakon «Ab palicyi» dazvalaje pravodzić asabisty dahlad hramadzian, dahlad ich rečaŭ, a taksama dahlad ich transpartnych srodkaŭ «pry najaŭnaści dadzienych» ab tym, što hetyja hramadzianie majuć pry sabie zbroju, bojeprypasy i inšyja niebiaśpiečnyja rečyvy.
Deputaty prapanujuć palehčyć pracu palicyi i zamianić farmuloŭku «pry najaŭnaści dadzienych» na «kali jość padstavy mierkavać»: zdahadki lahčej abhruntavać, čym dać kankretnyja dadzienyja ab najaŭnaści zbroi.
Akramia taho, deputaty chočuć ŭnieści dadatkovyja punkty ŭ art. 30 «Harantyja pravavoj abarony supracoŭnika palicyi» i zapisać tudy frazu pra toje, što
supracoŭnik palicyi nie niasie adkaznaść za škodu, pryčynienuju hramadzianam i arhanizacyjam pry vykanańni abaviazkaŭ, uskładzienych na palicyju.
Pry hetym pradstaŭniki MUS supakojvajuć: navat kali i vyhladaje na toje, što papraŭki istotna pašyrajuć paŭnamoctvy supracoŭnikaŭ orhanaŭ, to stralać pa natoŭpie i žančynach palicyjanty naŭrad ci pačnuć.
