U červieni 2014 hoda indeks spažyvieckich cen na tavary i pasłuhi ŭ Biełarusi vyras u paraŭnańni z majem na 1,2% i na 10,2% — u paraŭnańni sa śniežniem 2013 hoda, paviedamlaje pres-słužba Nacyjanalnaha statystyčnaha kamiteta.
Ceny na charčovyja tavary ŭ červieni hetaha hoda ŭ paraŭnańni z majem vyraśli na 1,6%, z pačatku hoda — na 13,8%. Najbolš istotna padaraželi bulba — 45,2%, kaŭbasnyja vyraby i vendžanina — 4,1%, miasa i ptuška — 3,9%.
Źnizilisia cana na sadavinu — na 6,2%, aharodninu — na 4,6%, jajki — 2,9%, cukar — 0,02%.
Ceny na niecharčovyja tavary ŭ červieni ŭ paraŭnańni z majem pavialičylisia na 0,3%, z pačatku hoda — na 2,6%. Bolš za ŭsio ŭ červieni padaraželi sintetyčnyja myjnyja srodki — na 1,7%, piśmovyja pryłady — na 1,4%, miedykamienty — na 1,3%. Źnizilisia ceny na meblu — na 0,6% i na abutak — 0,1%.
Ceny i taryfy na płatny pasłuhi za miesiac pavysilisia na 1,5%, z pačatku hoda — na 15,8%. Bolš za ŭsio padaraželi pasłuhi daškolnych ustanoŭ — na 11,6%, mižnarodnaha čyhunačnaha transpartu — na 11,4%, sanatorna-azdaraŭlenčyja — na 5,9%, pasažyrskaha transpartu — 3,4%, miedycynskija — na 2,8%, turystyčnyja — 2,2%. Źnizilisia ceny na pasłuhi kancertnych arhanizacyj — na 3%.
Nahadajem, aficyjny hadavy prahnoz inflacyi składaje 11%, adnak jon moža być pierahledžany ŭ horšy bok.
«Raniej na 2014 hod inflacyja prahnazavałasia na ŭzroŭni 11%, ale zaraz praličvajem, što jana budzie bolšaja — niedzie 16-17%», — zajaŭlała ŭ pačatku krasavika staršynia praŭleńnia Nacbanka Nadzieja Jermakova.
Pavodle prahnozaŭ Suśvietnaha banka, inflacyja pa vynikach 2014 hoda ŭ Biełarusi pieravysić 16%. Asabliva kali adbudziecca zapłanavanaje pavyšeńnie taryfaŭ na kamunalnyja pasłuhi i praciahniecca karekciroŭka abmiennaha kursu, zaznačali ekśpierty SB.
U 2013 hodzie inflacyja ŭ Biełarusi skłała 16,5%.