Polski sałdat padčas sumiesnych ź Litvoj i Ukrainaj vučeńniaŭ «Klanovaja arka-2012». Fota: Petras Malukas/AFP/East News
Prezident Ukrainy Piotr Parašenka i premjer-ministr Polščy Donald Task abmierkavali ŭ čas telefonnaj razmovy stvareńnie sumiesnaj polska-litoŭska-ŭkrainskaj vajennaj bryhady.
Ab hetym havorycca na aficyjnym sajcie ŭkrainskaha prezidenta.
«Baki ŭdzialili vialikuju ŭvahu pytańniu stvareńnia polska-litoŭska-ŭkrainskaj vajennaj bryhady «UkrPołLitBryh», u pryvatnaści, damovilisia padpisać adpaviednaje pahadnieńnie ŭ bližejšy čas», — havorycca ŭ paviedamleńni pres-słužby Parašenki na prezidenckim sajcie.
Prezident Ukrainy taksama padziakavaŭ Polščy za padtrymku i vykazaŭsia «za paskareńnie pracedur dapamohi z boku Polščy, u pryvatnaści, pieradačy zakuplenych broniekamizelek praz mytniu Respubliki Polšča».
Užo nočču Piatro Parašenka pravioŭ telefonnuju razmovu i z prezidentam Litvy Dalaj Hrybaŭskajcie.
Takim čynam, Ukraina stvoryć bajavuju bryhadu razam ź dźviuma krainami — udzielnicami NATA. Usie try krainy z XIV pa XVIII stahodździe ŭvachodzili ŭ adzinuju dziaržavu — fiederacyju Reč Paspalitaja.
Jašče u kancy traŭnia Kabmin Ukrainy zaćvierdziŭ prajekt pahadnieńnia ab stvareńni polska-litoŭska-ŭkrainskaj bryhady i ŭpaŭnavažyŭ v.a. abaviazki ministra abarony hienierał-pałkoŭnika Michaiła Kovala padpisać jaho padčas sustrečy vajennych Ukrainy, Polščy i Litvy. Jak raspaviadaŭ sam Koval, novaje padraździaleńnie stanie važnym elemientam supracoŭnictva z Paŭnočnaatłantyčnym aljansam.
«Dźvie krainy, jakija buduć uvachodzić u skład sumiesnaj bryhady — Polšča i Litva — heta krainy — členy błoka NATO, i my naš kampanient budziem taksama rychtavać dziela taho, kab my viedali standarty błoka NATA. U ich jość čamu pavučycca, paviercie mnie», — cytavała vajskoŭca ŭkrainskaja hazieta «Vieści».
Pa słovach Kovala, na bryhadu, u pryvatnaści, buduć uskładzieny miratvorčyja funkcyi «u tych haračych kropkach, jakich vielmi šmat na ziamli».
Jon taksama paviedamiŭ, što ŭkrainskaja častka bryhady budzie prachodzić padrychtoŭku ŭ Lvoŭskaj vobłaści, na bazie pry Akademii suchaputnych vojskaŭ imia hietmana Sahajdačnaha.
Historyja sumiesnaj bryhady viadomaj jak «UkrPołLitBryh» abo «LitPołUkrBryh» naličvaje nie adzin hod, nahadvaje sajt ŁIHA.Net.
Stvareńnie šmatnacyjanalnaha padraździaleńnia abmiarkoŭvałasia kiraŭnikami Minabarony krain ES i Ukrainy jašče ŭ 2007 hodzie.
U skład farmiravańnia płanavałasia ŭklučyć desantnyja, artyleryjskija, inžyniernyja častki, a taksama ŭzvod radyjacyjnaj, chimičnaj i bijałahičnaj abarony. Nieŭzabavie prajekt byŭ pieraniesieny na 2013 hod, a potym i zusim adkładzieny da lepšych časoŭ.
Cikavaść da sumiesnaj bryhady znoŭ paŭstaŭ paśla adchileńnia ad ułady Viktara Janukoviča. «Siońnia havorka moža iści navat pra stvareńnie nie nataŭskaha jeŭrapiejskaha abarončaha pojasa — dla abarony ad mahčymaj ahresii.
Nie vyklučana, što da prajektu mohuć dałučycca inšyja krainy Uschodniaj Jeŭropy, jakija taksama mohuć stać achviarami terytaryjalnych pretenzij Maskvy», — zapeŭnivajuć aŭtary ŁIHA.Net.
Schiema z sajta ŁIHA.Net
Upieršyniu ŭ sučasnaj historyi, chaj i na drobnym uzroŭni, paŭstaŭ prajekt u ramkach adradžeńnia Rečy Paspalitaj, — kaža starejšy navukovy supracoŭnik Instytuta mižnarodnych daśledavańniaŭ MDIMA (MHIMO) Leanid Husieŭ. «Polšču, Litvu i Ukrainu źviazvajuć stahodździ ahulnaj historyi ŭ miežach Rečy Paspalitaj, jakaja spyniła isnavańnie tolki z apošnim padziełam ŭ 1796 hodzie.
Prajšli stahodździ, a hieapalityčny prajekt adradžajecca. Mabyć, takija rečy žyvuć u ludziach na hienietyčnym uzroŭni», — razvažaje ekśpiert u hutarcy z «Ruskaj płanietaj».
Husieŭ adznačaje, što z praktyčnaha boku stvareńnie bryhady moža stać kanałam supracoŭnictva z NATA.
«Zrazumieła, što havorka idzie nie pra niepasrednaje partniorstva — a praz polska-litoŭskaje pasrednictva. Pakul praz polskuju mytniu ŭkraincy atrymlivajuć tolki broniekamizelki, ale ciapier havorka moža zajści pra uzbrajeńni.
Čuŭ, što ŭłady ZŠA mohuć dać Ukrainie da sotni viertalotaŭ «Apač». Voś dla takich pastavak i moža spatrebicca abychodny kanał», — tłumačyć śpiecyjalist.
Sumnieŭna, što polska-litoŭskija sałdaty prymuć udzieł u bajavych dziejańniach na paŭdniovym uschodzie Ukrainy, ale aficery sumiesnaj bryhady całkam mohuć treniravać ŭkrainskich sałdat, miarkuje Husieŭ.
U dobraachvotnickaj bataljonach ŭkrainskaha MUS užo zmahajucca hramadzianie jeŭrapiejskich krain. U bataljonie «Azoŭ» jość hrupa vałancioraŭ ź Italii, Francyi, Šviecyi, Finlandyi, krain Bałtyi, Hruzii, Biełarusi, pisała italjanskaja hazieta Il Giornale. Nibyta ciapier farmujecca habrejski bataljon «Maciłan» ź izrailcian, jakija naradzilisia va Ukrainie.
Całkam vierahodna, što dobraachvotniki pryjduć na dapamohu sajuznaj armii, ličyć Leanid Husieŭ.
