Haradskaja administracyja nazvała ličbu 18 zabitych i 66 paranienych za 18 lipienia. Siarod ich jość jak vajskoŭcy, tak i mirnyja žychary. Heta vynik bajoŭ, što pierasunulisia ŭ miažu abłasnoha centra. Jany praciahvalisia ceły viečar.
Uviečary ministr abarony Ukrainy rapartavaŭ, što ŭkrainskija vojski zaniali paŭdniovy ŭschod horada.
I ŭkrainskaja armija, i prarasijskija bajeviki ŭžyvajuć artyleryju. U haradskich umovach heta pryvodzić da hibieli mirnaha nasielnictva.
Zachop paŭdniovaha ŭschodu Łuhanska važny ŭ stratehičnym płanie. Kali ŭkraincam ŭdasca zamacavacca tam, buduć pierarezany šlachi zabieśpiačeńnia terarystaŭ zbrojaj z Rasijskaj Fiederacyi. Mienavita ŭ paŭdniova-ŭschodnim kirunku prachodzić daroha Łuhansk — Krasnodon — Izvaryna — miaža Rasii.
Žychary Łuhanska paviedamlajuć u sacyjalnych sietkach, što ŭ dadzieny momant va ŭsim horadzie čuvać aŭtamatnaja i kulamiotnaja stralanina.
Try dni nazad ukraincy ŭžo dajšli da paŭdniovaha zachadu 450-tysiačnaha horada i da aeraporta, ale byli vymušany adstupić pad udarami «Hradaŭ».
«Ministr abarony hienierał-pałkoŭnik Valeryj Hielatej dałažyŭ prezidentu Ukrainy Piatru Parašenku ab tym, što Uzbrojenyja Siły Ukrainy ŭziali pad kantrol paŭdniova-ŭschodniuju častku horada Łuhansk. Taksama ŭkrainskija vajskoŭcy razbłakavali aeraport Łuhanska. Uzbrojenyja Siły praciahvajuć vyzvaleńnie nasielenych punktaŭ Ukrainy ad hrupovak bajevikoŭ», — havorycca ŭ paviedamleńni pres-słužby prezidenta Ukrainy.
Apieracyju praviała miechanizavanaja 30-ja bryhada.