Kali 1 vieraśnia 1983 hodu ŭ niebie nad Sachalinam saviecki źniščalnik «Su-15» źbiŭ pasažyrski «Boinh 747» paŭdniovakarejskaj avijakampanii, jaki vykonvaŭ rejs pa maršrucie Ńju-Jork—Sieuł, to pieršaje paviedamleńnie TASS pra hetuju padzieju vyhladała prykładna tak: u pavietranuju prastoru SSSR zahłybiŭsia nieviadomy samalot, savieckija vajennyja samaloty jaho pieraśledavali, pakul toje nieviadomaje sudna nia vyjšła za našy miežy. Potym, pad ciskam faktaŭ, abureńnia ŭsiaśvietnaj supolnaści Maskva musiła pryznać, što paŭdniovakarejski «Boinh» byŭ usio ž źbity savieckimi vajskoŭcami. I kali na pres-kanfierencyi zamiežnyja žurnalisty spytalisia ŭ zahadčyka adździeła mižnarodnaj infarmacyi CK KPSS Leanida Zamiacina: «navošta vy kazali niapraŭdu ŭ pieršym paviedamleńni TASS?», jahony adkaz možna ličyć uzoram virtuoznaj demahohii savieckaj prapahandy: «vy zrabili niapravilny pierakład z ruskaj dypłamatyčnaj movy.
Hetaja fraza ŭzhadvajecca, kali słuchaju zajavy rasijskich aficyjnych asobaŭ, dziaržaŭnych medyjaŭ z nahody źbićcia małajzijskaha «Boinha». Źviartaje na siabie ŭvahu niezvyčajnaja reakcyja na hetuju trahiedyju Uładzimira Pucina. Jon, byccam čahości mocna spałochaŭšysia, niejak dziŭna zamitusiŭsia. Zdavałasia b, katastrofa zdaryłasia na terytoryi susiedniaj dziaržavy, samalot nie rasijski, hramadzian RF na borcie nie było, a pavodle aficyjnaj viersii Kramla, nijakaj padtrymki sieparatystam na ŭschodzie Ukrainy Maskva nie akazvaje. To bok Rasija byccam by tut zusim ni pry čym. Ale Uładzimir Pucin niby za niešta apraŭdvajecca. Adrazu ž paśla padzieńnia «Boinha» jon robić biaskoncyja telefanavańni zachodnim lideram, demanstratyŭna pravodzić u teleefiry chvilinu maŭčańnia ŭ pamiać zahinułych u katastrofie, vystupaje ź niejkim dziŭnym pustym načnym telezvarotam, lichamankava pravodzić pasiedžańnie Rady biaśpieki RF.
Niepakoj Pucina zrazumieły. Źniščeńnie pasažyrskaha avijałajniera pryncypova mianiaje ŭvieś kantekst rasijska-ŭkrainskaha kanfliktu. Da hetaha času vajna na ŭschodzie Ukrainy dla ŭsiaho śvietu, u tym liku dla ZŠA i Jeŭropy, była ŭ peŭnym sensie hieapalityčnaj abstrakcyjaj. Tak, Rasija parušaje mižnarodnyja praviły, joj treba na heta miakka pakazać, ale psavać adnosiny z Maskvoj nie chočacca, bo na jaje zaviazana šmat roznych intaresaŭ.
Ciapier stanovicca vidavočnym, što vajenny ačah na ŭschodzie Ukrainy — heta pahroza mižnarodnaj biaśpiecy. Hetaja vajna pačała zabivać hramadzian Niderłandaŭ, Małajzii, Aŭstralii dy inšych krain, dalokich ad miesca bajavych dziejańniaŭ. Bo ŭ epochu hłabalizacyi biaśpieka moža być tolki ŭsieahulnaj.
U mianie jość sumnievy, što mižnarodnaja kamisija, jakaja rasśleduje pryčyny katastrofy, pryjdzie da niejkich peŭnych vysnovaŭ adnosna taho, chto źbiŭ samalot. Jak, naprykład, mižnarodnaja kamisija tak i nie pryjšła da vysnovy, chto prymianiaŭ chimičnuju zbroju ŭ Siryi. Heta ciažka zrabić, asabliva va ŭmovach, kali supracoŭničać ź mižnarodnymi ekśpiertami vinavatyja nia chočuć, a prymusić ich niemahčyma.
Ale navat kali takija vysnovy buduć zroblenyja, to baki ŭkrainskaj vajny ich nie pryznajuć. Kali kamisija abvieścić, što samalot źbili sieparatysty, to lidery DNR, a za imi i Rasija skažuć, što ekśpierty anhažavanyja, kuplenyja Zachadam. Jak nie pryznaŭ SSSR vynikaŭ mižnarodnaha rasśledavańnia trahiedyi z paŭdniovakarejskim «Boinham» u 1983 hodzie. Padčas žorstkaj infarmacyjnaj vajny pa-inšamu nie byvaje. Źbity łajnier stanie tolki novaj porcyjaj bienzinu ŭ ahoń hetaj vajny.
Adnak navat u situacyi niavyznačanaści što da kankretnych vinoŭnikaŭ źniščeńnia małajzijskaha avijałajniera zachodnija dziaržavy abvinavacili siońnia Maskvu. Pucin nie pamyliŭsia ŭ svaich pradčuvańniach. I łohika Zachadu zrazumiełaja. Kali, jak vykazaŭsia rasijski žurnalist Uładzimir Sałaŭjoŭ, «samalot źbiła vajna», to chto arhanizavaŭ hetuju vajnu? Biez padtrymki Rasii vajenny kanflikt na ŭschodzie Ukrainy byŭ by niemahčymy. U takim vypadku Maskva pavinna nieści palityčnuju adkaznaść za źbity avijałajnier.
Adnym z važnych nastupstvaŭ avijakatastrofy nad Danbasam stała bolš rašučaja pazicyja Jeŭropy adnosna nieabchodnaści spynieńnia vajennaha kanfliktu i acenak pazicyi Rasii. Ciapier u hramadskaj dumcy Zachadu Rasija vyhladaje sponsaram mižnarodnaha teraryzmu. I ad hetaha vobrazu Maskvie ciažka admycca. Jak skazaŭ premjer Aŭstralii Toni Ebat, «Rasija nia vyjdzie suchoj z vady».
