Abmierkavańni ŭ miežach fokus-hrup pakazali, što ŭ vypadku značnaha rostu taryfaŭ na ciepłazabieśpiačeńnie biełarusy stanuć mienš tracić srodkaŭ na charčavańnie, havorycca ŭ daśledavańni Suśvietnaha banka.
Daśledavańnie było pryśviečana refarmavańniu taryfnaj palityki.
«U miežach abmierkavańniaŭ u fokusnych hrupach 90% udzielnikaŭ ź liku chatnich haspadarak ź nizkimi dachodami, jakija nie atrymlivajuć sacyjalnyja dapamohi, 67% ź liku chatnich haspadarak ź nizkimi dachodami, jakija atrymlivajuć sacyjalnyja dapamohi, i 53% ź liku chatnich haspadarak ź siarednim uzroŭniem dachodaŭ adznačyli, što jany skarociać raschody na charčavańnie dla taho, kab apłačvać bolš vysokija taryfy», — havorycca ŭ daśledavańni SB.
Ekśpierty Suśvietnaha banka adznačajuć, što nastupstvy pavyšeńnia taryfaŭ na aciapleńnie buduć najbolej vostra adčuvacca ŭ zimovy pieryjad. «Aciaplalny siezon u Biełarusi zvyčajna pačynajecca ŭ kastryčniku i zaviaršajecca ŭ krasaviku. Adpaviedna, raschody chatnich haspadarak na apłatu pasłuh ciepłazabieśpiačeńnia ŭzrastajuć u pieršy i apošni kvartały hoda», — kanstatujuć aŭtary daśledavańnia.
Pavodle acenak ekśpiertaŭ, pry ciapierašnim uzroŭni taryfaŭ raschody na pasłuhi ciepłazabieśpiačeńnia dasiahajuć u aciaplalny pieryjad 4,5% ad štomiesiačnaha dachodu biełaruskich siemjaŭ.
«Pavodle scenaryja adzinaj cany pry poŭnym pakryćci raschodaŭ za košt taryfaŭ haradskija chatnija haspadarki, jakija adnosiacca da 40% nasielnictva ź nizkimi dachodami, buduć raschodavać prykładna 23% svaich dachodaŭ na pasłuhi centralizavanaha ciepłazabieśpiačeńnia ŭ pieršym kvartale; pavodle scenaryja dyfierencyravanaj cany sielskija chatnija haspadarki, što adnosiacca da 40% nasielnictva ź nizkimi dachodami, buduć raschodavać 21%», — prahnazujuć ekśpierty Suśvietnaha banka.
Pavodle raźlikaŭ ekanamistaŭ Suśvietnaha banka, pry dziejnym uzroŭni cen na aciapleńnie taryfy na ciepłazabieśpiačeńnie, ustanoŭlenyja dla nasielnictva, pakryvajuć nie bolš za 25% faktyčnych raschodaŭ. U toj ža čas ekśpierty źviartajuć uvahu, što ŭrad raniej u prahramnych dakumientach zapłanavaŭ rost taryfaŭ da poŭnaha pakryćcia faktyčnych raschodaŭ.
«Urad płanuje pavialičyć taryfy na centralizavanaje ciepłazabieśpiačeńnie da ŭzroŭniu pakryćcia raschodaŭ i ažyćciavić paetapnuju admienu subsidyj, zamianiŭšy ich prahramami sacyjalnaj dapamohi», — havorycca ŭ daśledavańni Suśvietnaha banka.
Tym časam biełaruskija ekanamisty ličać, što spačatku (da pavyšeńnia taryfaŭ) nieabchodna pavysić efiektyŭnaść pracy haliny (žyllova-kamunalnaj haspadarki) i tolki potym razhladać pytańnie ab pavyšeńni taryfaŭ dla nasielnictva.
«U pieršuju čarhu nieabchodna vyznačyć efiektyŭnaść vykarystańnia srodkaŭ, jakija nasielnictva nakiroŭvaje na apłatu žyllova-kamunalnych pasłuh, a tolki potym pavyšać taryfy na hetyja pasłuhi», — miarkuje ekanamist Daśledčaha centra IPM Hleb Šymanovič.
Jak paviedamlałasia raniej, u lutym 2014 hoda pa daručeńni Alaksandra Łukašenki stvorana mižviedamasnaja hrupa, jakaja zajmajecca prablemnymi pytańniami ŭ śfiery ŽKH. Rabočaj hrupie (jaje ŭznačalvaje staršynia Kamiteta dziaržkantrolu Alaksandr Jakabson) daručana vyznačyć realny košt žyllova-kamunalnych pasłuh.
