Sudździa pryniaŭ kurjoznaje rašeńnie paśla taho, jak naš bajec pačaŭ źbivać dvuchrazovaha čempijona śvietu z Hiermanii Šcihlica.
Boj u niamieckim Dasaŭ, dzie biełarus Siarhiej Chamicki sustrakaŭsia z zornym Robiertam Šcihlicam, skončyŭsia haniebnym kurjozam.
Čakałasia, što dvuchrazovy čempijon śvietu ŭ adnu bramku raźbiarecca ź biełarusam. Ale Siarhiej Chamicki ŭpeŭniena ŭziaŭ pieršy raŭnd, a paźniej pajadynak prachodziŭ u roŭnym i bieskampramisnym zmahańni. Abodva bajcy atrymali hiematomy i raśsiačeńni.
Kali Siarhiej Chamicki zrazumieŭ, što jaho «siečka» moža stać padstavaj dla spynieńnia boju, to pačaŭ ryzykavać. U kancy 9-ha raŭnda naš bajec niekalki razoŭ akcentavana trapiŭ Šcihlicu pa korpusie, skałynuŭ niemca ŭvažystym levym sustrečnym, a na apošich siekundach čysta patrapiŭ imklivaj dvojkaj. Šcihlic straciŭ aryjentacyju i prysieŭ na kalena. Ale polski refiery Źbihnieŭ Łahaš zrabiŭ vyhlad, što nakdaŭnu nie było i va ŭsim vinavaty ślizki rynh.
Da zaviaršeńnia dvuboju zastavałasia jašče cełyja try raŭndy. I tut pačałosia vyčvarenstva. Nie prajšło i troch siekund ad pačatku 10-ha raŭnda, jak palak spyniŭ pajadynak z-za raźviazanych płastyraŭ na palčatcy Siarhieja Chamickaha. Z hetaj pryčyny boj byŭ zavieršany. Była zafiksavana «pieramoha» Robierta Šcihlica techničnym nakaŭtam. Jašče nikoli ŭ historyi boksu pajadynki takoha ŭzroŭniu nie spynialisia z-za adklejenaha na palčatcy płastyru. Možacie navat nie šukać pa internecie, nie znojdziecie.
Što praŭda, siekundancki vuhał Siarhieja Chamickaha sapraŭdy vyhladaŭ pa-žabracku. Tam nie było ni katmana, jaki moh by łakalizavać raśsiačeńnie, ni tejpiroŭščyka, jaki moh by narmalna zafiksavać palčatki płastyram. Nie było i treniera Kanstancina Machańkova.
Trenier Chamickaha: «Upieršyniu ŭ žyćci takoje pabačyŭ»
«Kanstancin Michajłavič, što heta takoje zdaryłasia?» - źviazvajemsia sa śpiecyjalistam na nastupny dzień paśla boju.
Kanstancin Machańkoŭ: «Skazali, što na palčatcy raźviazaŭsia tejp, i z hetaj pryčyny spynili čempijonski boj. Voś takaja pryčyna. Upieršyniu ŭ žyćci ja sutykajusia z takoj situacyjaj u prafiesijnym boksie dy jašče i ŭ tytulnym pajadynku za zvańnie interkantynientalnaha čempijona, dzie pieramožca vychodziŭ na boj za płanietarny pojas! I navat nie napisali «dyskvalifikacyja», a padali heta ŭsio jak «techničny nakaŭt».
Jeŭraradyjo: Robiert Šcihlic, było padobna, taksama ździviŭsia. Choć i skazaŭ: «Heta boks, zdarajecca ŭsialakaje».
Kanstancin Machańkoŭ: «Robiert Šcihlic nasamreč rabiŭ svaju pracu. Heta rašeńnie na sumleńni menedžaraŭ i pramoŭtaraŭ, jakija pierastrachavalisia i arhanizavali taki voś niedarečny vynik. Darečy, naradziŭsia Šcihlic u Rasii, choć i źjaŭlajecca niemcam pa nacyjanalnaści. Ja sam niekali u jakaści sparynh-partniora dapamahaŭ jamu rychtavacca da troch pajadynkaŭ. Siabravali, byŭ u jaho doma, viedaju jaho žonku… Vielmi prykra, što zaraz usio tak atrymałasia. Nie dali dahledzieć taki kłasny boj. Ludzi byli źbiantežanyja, nie razumieli, što zdaryłasia. Adčuvałasia, što Siarhiej Chamicki zdoleje supiernika nakaŭtavać».
Jeŭraradyjo: Šcihlic prapuściŭ ad Chamickaha sakrušalny ŭdar źleva ŭ kancy 9-ha raŭndu. Ci byŭ tam nakdaŭn, na vašu dumku?
Kastancin Machańkoŭ: «Kaniešnie, Siarhiej navat pajšoŭ u supraćlehły kut. A pramoŭtary, napeŭna, zrazumieli, što zapachła smažanym i vyrašyli lubym sposabam źniać biełarusa z boju. Razam z tym u mianie jość šmat pytańniaŭ da siekundantaŭ Siarhieja. Da taho ž Valeryja Kapli (menedžar, - Jeŭraradyjo). Jak było mahčyma tak zatejpavać palčatki, što jany raźviazalisia? Ja za ŭsiu svaju baksiorskuju karjeru takoha nie bačyŭ ni razu».
Jeŭraradyjo: Ale WBO pierad bojem pastaviła na tejpach svaju piačać. To bok adkanaść lažyć i na arhanizatarach, tamu spynieńnie boju možna asprečvać!
Kanstancin Machańkoŭ: «Voś my i pabačym, ci stanie Biełaruskaja fiederacyja prafiesijnaha boksa abaraniać svajho bajca».
Jeŭraradyjo: Čamu vy sami nie prysutničali ŭ kucie Siarhieja Chamickaha? Vy ž jaho trenirujecie, vy jaho vyvieli na pik formy.
Kanstancin Machańkoŭ: «Ja nie maju prava prysutničać na prafiesijnych pajadynkach, pavodle praviłaŭ AIBA (Amatarskaj mižnarodnaj baksiorskaj asacyjacyi, jakaja kuryruje alimpijski boks, - Jeŭraradyjo). Kali b ja tam prysutničaŭ, to nie zmoh by pajechać na Alimpijadu, kali našy baksiory zavajujuć tudy licenziju. A heta dla mianie vielmi važny stymuł».
Siarhiej Chamicki nie ŭtojvaje, što raźličvaŭ na nakaŭt u poźnich raŭndach
Jeŭraradyjo: Ci mieli vy hutarku ź Siarhiejem paśla hetaha boju?
Kanstancin Machańkoŭ: »Tak. Jon u vielmi ciažkim maralnym stanie. Ja toje samaje adčuvaŭ padčas Alimpijady ŭ Łondanie, kali zabrali miedal ŭ Siarhieja Karniejeva (jašče adzin vučań Kanstancina Machańkova, - Jeŭraradyjo). Toje samaje i tut. Zastavalisia try čempijonskija raŭndy, byŭ naniesieny šerah sakrušalnych udaraŭ, byŭ vialiki šaniec skončyć hety boj daterminova. Marami Siarhiej užo biŭsia za suśvietny tytuł z Abrachamam».
Jeŭraradyjo: Što zaraz moža čakać Chamickaha?
Kanstancin Machańkoŭ: «Farmalna jon prajhraŭ boj techičnym nakaŭtam i praz heta spuściŭsia ŭ suśvietnych rejtynhach. U toj ža čas usie pabačyli, što choć Chamicki i maje 40 hadoŭ, jon zvyšniebiaśpiečny. Nichto z topavych bajcoŭ nie zachoča ź im baksiravać, bo heta vialikaja ryzyka. Chto nie viedaje rehalij Šcihlica, toj i nie razabraŭsia, chto ŭ rynhu byŭ dvuchrazovym čempijonam śvietu. Šcihlic musiŭ być na dźvie hałavy vyšejšym, a Chamicki - prosta niejkim mužykom. A tut hety 40-hadovy mužyk ciaham usiaho boju išoŭ napierad i tolki jon nanosiŭ ciažkija akcentavanyja ŭdary. Voś što, pavodle praviłaŭ, cenicca ŭ prafiesijnym boksie pry abjektyŭnym sudziejstvie. Tamu revanšu sa Šcihlicam dakładna nie budzie. Niemcy nie stanuć znoŭku hulacca z vahniom».
Jeŭraradyjo: Dzie zaraz Siarhiej Chamicki?
Kanstancin Machańkoŭ: «Jon palacieŭ u Šviejcaryju da svajoj hiorłfrend. Spadziajusia, tam jon maralna supakoicca».
Eksieprty pra boj Šcihlic Chamicki: sprečna, supiarečliva, haniebna…
Rašeńnie polskaha refiery Źbihnieva Łahaša aktyŭna abmiarkoŭvajecca ŭ ŚMI i na śpiecyjalizavanych baksiorskich sajtach.
Zrazumieła, u niamieckich miedyja prosta padajuć suchuju infarmacyju pra toje, što ich bajec pieramoh techničnym nakaŭtam.
A voś vytrymki z analizu amierykanskaha spartovaha partału bleacherreport.com:
«Refiery spyniŭ boj, bo vyrašyŭ, što siekundanty Chamickaha zanadta doŭha mianiajuć tejpy na jaho palčatkach. Heta rašeńnie było supiarečlivym».
«U dzieviatym raŭndzie Chamickamu ŭdałosia surjozna skałynuć Šcihlica i na momant spynieńnia boj byŭ vielmi kankurentnym», - vykazvaje mierkavańnie samy papularny na postsavieckaj prastory bajcoŭski sajt allboxing.ru. Samo spynieńnie boju resurs nazyvaje «sprečnym».
Papularny ŭkrainski baksiorski partał boxnews.com.ua nazvaŭ dvuboj Šcihlic-Chamicki «haniebnym sudziejskim svavolstvam».
