Na vulicy Hikały ŭ Minsku 1 vieraśnia budzie zapuščany piłotny prajekt pa stvareńni płatnaj parkoŭki z vykarystańniem novych technałohij apłaty i kantrolu, paviedamiŭ na pres-kanfierencyi 19 žniŭnia dyrektar Biełaruskaj asacyjacyi ekśpiertaŭ i siurviejeraŭ na transparcie Juryj Važnik.
«My chacieli b radykalna źmianić technałohiju, adyści ad mahčymaj karupcyi i pryjści da niezaležnaha sposabu ŭpłyvu na parkoŭki, vykarystoŭvajučy ŭ jakaści pryjarytetu vuličnyja parkoŭki», — skazaŭ jon.
Pavodle słoŭ Važnika, vulica Hikały vybrana dla piłotnaha prajekta, pakolki, niahledziačy na zabaronu, minčanie pakidajuć na joj svaje aŭtamabili, a raźmieščanyja ŭ hetym rajonie achoŭnaja stajanka i płatnaja parkoŭka pustujuć.
Apłatu parkoŭki na Hikały možna budzie ažyćciaŭlać piaćciu sposabami: kupić tałon na parkoŭku ŭ kijosku «Minsktransa», apłacić parkoŭku ŭ parkamacie i z mabilnaha telefona — pry dapamozie SMS, USSD-zapytu ci śpiecyjalnaha dadatku dla smartfonaŭ.
Apłata parkoŭki budzie kantralavacca, a štrafy za nieapłačanuju parkoŭku buduć nakiroŭvacca ŭładalniku aŭtamabila pa pošcie, adznačyŭ Važnik.
Jon taksama raskazaŭ, što paśla realizacyi piłotnaha prajekta na Hikały pačniecca intensiŭnaje raźvićcio zony płatnych parkovak da druhoha kalca. «Havorka idzie pra minimum 12 tysiač parkovačnych miescaŭ», — zajaviŭ jon.
Pavodle słoŭ śpiecyjalista, stvareńnie sietki płatnych parkovak dapamoža ekołaham u baraćbie za pašyreńnie vykarystańnia minčanami hramadskaha transpartu, pakolki pajezdka na asabistym aŭtamabili, naprykład, na pracu stanie niavyhadnaj, bo ŭładalnik budzie vymušany na ŭvieś dzień pakidać jaho na płatnaj parkoŭcy. «Chutčej za ŭsio, pałova [aŭtaŭładalnikaŭ] pačnie dumać pra pajezdku na hramadskim transparcie», — padkreśliŭ jon.
Akramia taho, adznačyŭ Važnik, haradskija ŭłady razhladajuć mahčymaść uviadzieńnia płaty za prajezd na aŭtamabili pa centry horada. «Prajekt užo prarysavany, sfarmulavany, ale da jaho treba padrychtavać ludziej», — skazaŭ jon.
