Viarchoŭny pradstaŭnik ES pa zamiežnych spravach i palitycy biaśpieki, namieśnik staršyni Jeŭrapiejskaj kamisii Ketryn Eštan adznačyła važnuju rolu Biełarusi ŭ praviadzieńni sustrečy ŭ Minsku pa pytańniach urehulavańnia situacyi va Ukrainie. Na hetym jana akcentavała ŭvahu siońnia ŭ čas sustrečy z kiraŭnikom Biełarusi Alaksandram Łukašenkam.
Ketryn Eštan padkreśliła, što razam ź joj u składzie delehacyi ŭ Minsk prybyli jeŭrakamisar pa enierhietycy Hiunter Etynhier i jeŭrakamisar pa pytańniach handlu Kareł de Hiucht.
«Pierš za ŭsio, dziakuj za prajaŭlenuju inicyjatyvu pa praviadzieńni hetaj sustrečy, — padkreśliła Ketryn Eštan. - Heta važnaje mierapryjemstva, kab zasiarodzić uvahu na padziejach, jakija adbyvajucca va Ukrainie. I vielmi važna, kab kiraŭniki krain rehijona mahli ŭklučycca ŭ hety dyjałoh».
«Naša pazicyja dakładnaja: my padtrymlivajem vybar Ukrainy, šlach, pa jakim idzie ŭkrainski narod», — padkreśliła jana, dadaŭšy, što dla Ukrainy važna mieć dobryja adnosiny sa svaimi susiedziami i krainami ES.
Ketryn Eštan vykazała nadzieju, što sustreča dapamoža vyrašyć vykliki, jakija stavić situacyja va Ukrainie.
Alaksandr Łukašenka, u svaju čarhu, nie čakaje ad sustrečy ŭ Minsku kałasalnaha praryvu ŭ pytańni ŭrehulavańnia situacyi na ŭschodzie Ukrainy, ale spadziajecca, što minskaja sustreča daść mahčymaść kanceptualna vyznačycca, kab pačać ruch da miru va Ukrainie.
«Nam ciažka stavić jakija-niebudź hrandyjoznyja mety, jakich my pavinny dasiahnuć tut u Minsku, — adznačyŭ kiraŭnik dziaržavy. - Chutčej za ŭsio, kałasalnaha praryvu ciažka čakać, ale kanceptualna my pavinny vyznačycca, kab chacia b pačać ruch da miru. Nichto z kiraŭnikoŭ dziaržaŭ, vy nie budziecie suprać taho, kab pačaty siońnia dyjałoh byŭ pradoŭžany da poŭnaha ŭrehulavańnia situacyi».
Jon padkreśliŭ, što «treba hety kanflikt, jaki siońnia razharnuŭsia ŭ centry Jeŭropy, lubymi sposabami prytušyć». Alaksandr Łukašenka skazaŭ, što tolki što sustrakaŭsia z prezidentam Ukrainy Piatrom Parašenkam, jašče raniej heta tema abmiarkoŭvałasia z prezidentam Rasii Uładzimiram Pucinym. «Va ŭsich jość žadańnie heta skončyć, nikomu nie patrebna heta bratazabojčaja vajna. Patrebny mir. Nie budzie miru — nie budzie i ekanomiki. Nie budzie potym razmovy pamiž Ukrainaj i Jeŭrasajuzam, Mytnym sajuzam ab urehulavańni niejkich ekanamičnych prablem. Patrebny mir. Heta samaje hałoŭnaje», — padkreśliŭ kiraŭnik Biełarusi.
Jon taksama zapeŭniŭ: «My zrobim usio, što ŭ našych siłach, kab vykanać usie dasiahnutyja tut damoŭlenaści i kab stvaryć u Minsku placoŭku dla pierahavornaha pracesu». Kiraŭnik biełaruskaj dziaržavy padkreśliŭ, što Biełaruś hatova syhrać svaju rolu, kab rušyć napierad u pytańni ŭrehulavańnia situacyi va Ukrainie.
