Prezident Kazachstana Nursułtan Nazarbajeŭ zaklikaje da nieadkładnaha vyrašeńnia humanitarnaj katastrofy na ŭschodzie Ukrainy. Ab hetym jon zajaviŭ na sustrečy lidaraŭ mytnaj «trojki», Ukrainy i pradstaŭnikoŭ ES/
«Ciapier treba zabiaśpiečyć pierš za ŭsio maštabnuju humanitarnuju dapamohu nasielnictvu Ukrainy, jakoje paciarpieła, — padkreśliŭ kazachstanski lidar. — Rasijskaja Fiederacyja pačała ŭžo jaje akazvać. U hetym pracesie pavinny pryniać udzieł mižnarodnyja arhanizacyi, u tym liku Mytny sajuz, SND».
Kazachstan sa svajho boku hatovy akazać padtrymku, u tym liku pa linii kazachstanskaha adździaleńnia tavarystva Čyrvonaha Kryža. Pavodle słoŭ Nursułtana Nazarbajeva, heta arhanizacyja taksama moža vystupić u jakaści niejtralnaha pasrednika pry kanvairavańni humanitarnych hruzaŭ inšych dziaržaŭ.
«U cełym važna zabiaśpiečyć niepraduziaty mižnarodny kantrol nad dastaŭkaj humanitarnaj dapamohi Ukrainie. Tamu ja zaklikaju kanfliktujučyja baki abjavić pieramirje na čas akazańnia dapamohi ludziam», — skazaŭ Nursułtan Nazarbajeŭ.
«Patrebna mirnaja pieradyška, heta daść mahčymaść vyratavać žyćci mirnaha nasielnictva, jakoje stała załožnikam vajenna-palityčnaha procistajańnia. My asudžajem nasille, zaklikajem baki da chutčejšaha spynieńnia ahniu. U hetym pracesie pavinna być aktyŭna zadziejničana ABSIE, jakoje moža vystupić harantam vykanańnia mižnarodnych damoŭlenaściej», — skazaŭ jon.
Jon taksama adznačyŭ, što poŭnamaštabnaja dapamoha ŭsioj mižnarodnaj supolnaści patrebna nie tolki paŭdniovamu ŭschodu Ukrainy, ale i ŭsioj ukrainskaj ekanomicy. Na dumku Nursułtana Nazarbajeva, u hetym pavinny pryniać udzieł susiedzi Ukrainy - jak na Zachadzie, tak i na Uschodzie. «Heta krytyčna važna dla praduchileńnia sacyjalna-ekanamičnaha kałapsu va Ukrainie», — upeŭnieny kazachstanski lidar.
Nursułtan Nazarbajeŭ ličyć važnym sumiesna abmiarkoŭvać vostryja pytańni i znachodzić kampramisy - zrazumieła, što lohkich rašeńniaŭ niama. Jon źviarnuŭ uvahu, što sustreča ŭ Minsku - unikalny šanc dla pošuku aptymalnych šlachoŭ dla pieraadoleńnia samaha maštabnaha kryzisu ŭ rehijonie. Prezident Kazachstana vykazaŭ nadzieju, što dyjałoh, jaki pačaŭsia, pasłužyć stabilizacyi situacyi va Ukrainie i ŭ rehijonie ŭ cełym.
