U Viciebsku płanujuć źniać z handlu sokaźmiaščalny hranatavy napoj, jaki pradavaŭsia pad vyhladam soku. Ab hetym paviedamiła viciebskaja haradskaja hazieta «Vićbičy».
Vytvorcy pradukcyi — tavarystvy z abmiežavanaj adkaznaściu «Vytok» z Maskvy (handlovaja marka «Azierbajdžanski frukt») i «Silit» z Maskoŭskaj vobłaści (handlovaja marka «555»).
«Pavodle patrabavańniaŭ techničnych rehłamientaŭ Mytnaha sajuza, jakija datyčacca sokavaj pradukcyi i biaśpieki charčovych dabavak, u sokach nie pavinny ŭtrymlivacca kansiervanty i farbavalniki. Jany dapuskajucca tolki ŭ napojach, — skazała karespandentu haziety načalnik Viciebskaj abłasnoj inśpiekcyi Dziaržstandarta Aksana Muraškievič. — Na etykietcy sokaŭ handlovaj marki «Azierbajdžanski frukt» ukazany skład: sok vinahradny (hranatavy, šypšyny) kancentravany, cukar. Kali my vyprabavali pradukcyju ŭ łabaratoryi, to vyjavili, što ŭ vinahradnym prysutničajuć kansiervant (bienzojnaja kisłata i jaje soli) i farbavalniki — azarubin, tartrazin, žoŭty «soniečny zachod». U hranatavym soku i ŭ sumiesi hranata z šypšynaj — bienzojnaja kisłata i jaje soli, a taksama farbavalnik azarubin».
Pavodle słoŭ ekśpierta, rasijskaje pradpryjemstva nie tolki parušyła patrabavańni techničnych rehłamientaŭ, jakaja vykarystała pry vypracoŭcy sokaŭ charčovyja dabaŭki, ale i nie zadekłaravała ich u infarmacyi dla spažyŭca, u toj čas jak farbavalniki, što ŭvachodziać u skład, mohuć akazvać admoŭny ŭpłyŭ na aktyŭnaść i ŭvahu dziaciej. «Takim voś čynam pakupnika ŭvodziać u zman, bo heta nasupierak zapavietnym litaram na etykietcy zusim nie sok, tamu što tut jość kansiervant i farbavalniki, a značyć, vytvorca metanakiravana sfalsifikavaŭ pradukcyju», — adznačyła Muraškievič.
«Vielmi supiarečlivaja infarmacyja raźmieščana na butelcy z pradukcyjaj vytvorčaści TAA «Silit». Inśpiektary Dziaržstandarta cikavilisia ŭ ludziej, što ž heta takoje, na ich pohlad, — z apietytnym hranatam na etykietcy, i amal usie, nie zadumvajučysia, adkazvali: sok. Sapraŭdy, tam ukazana: «Hranatavy», a krychu nižej drobnym šryftam: «Napoj sokaźmiaščalny multyfruktavy» (sok hranatavy, jabłyčny, limonnaja kisłata, vada, minimalnaja dola soku nie mienš za 10 pracentaŭ). Atrymlivajecca, spažyŭca znoŭ sprabavali abvieści vakoł palca. Akramia taho, na ceńniku napoju było ŭkazana: «Hranatavy sok», — piša vydańnie.
Muraškievič adznačyła, što ciapier rychtujecca pradpisańnie na adklikańnie pradukcyi maskoŭskaha TAA «Vytok» z handlovaj sietki respubliki. Imparcior, u svaju čarhu, vyrašyć, što rabić ź joj dalej: viarnuć vytvorcu ci ŭtylizavać.
Abłasnaja inśpiekcyja Dziaržstandarta abiacaje trymać situacyju z sokami na pastajannym kantroli.
